Book of the Year 2019 lawmman hlân

Mizo Academy of Letters (MAL)-in kum 2019 chhunga Mizo iráwm chhuak lehkhabu zinga ṭha bera an thlan, 'Falung' tih ziaktu Lalengzauva hnenah nimin khan Art & Culture minister R Lalzirliana'n Central YMA Hall-ah lawmman a hlan.

R Lalzirliana chuan, MAL hmalakna fakin, Mizo hnam tana rohlu an nih thu a sawi a, "Lehkhabu ṭha tam tak zinga Book of the Year atana thlan 'Falung' hi lehkhabu ngaihnawm leh zirtirna nei ṭha, kan ramin a mamawh em em dikna leh huaisen inzirtirna, nu leh pate thu awih pawimawhzia tarlangtu a ni," a ti.

Art & Culture Minister hian MAL vice president C Chhuanvawra buatsaih 'Mizo ṭawng dictionary' (A lam rik dan nen) tih lehkhabu a tlangzarh nghal.

MAL hian Book of the Year lawmman hi MAL din champha April 23-ah an hlàn ṭhin a, kuminah chuan hripui léng vangin a hunah an hlân thei lo. Book of the Year dawngtu hnenah hian lawmman atan thuchei leh Rs. 5,000 an hlan a ni.

Book of the Year thlang tur hian kum 2019 chhunga Mizo iráwm chhuak lehkhabu 231 endik a ni.