COVID-19: Mizoram dinhmun Hripui vei 14 hmuh belh a ni

December 10, Ningani khan Mizoramah Covid-19 vei mi 14 hmuh chhuah a ni a, nimin khan mi 20 chhuahtir an ni thung a; nimin vêk khan hripui vei enkawl lai pakhat a thi.

Covid-19 vei Ningania hmuh chhuah mi 14-te chu mipa 10 leh hmeichhia pali an ni a; ZMC laboratory-a hmuh mi panga, TrueNAT-PCR hmanga hmuh mi pathum leh Rapid Antigen Test (RAT) hmanga hmuh mi paruk an ni.

Nimin khan hripui laka fihlim tawh mi 20 chhuahtir an ni a; SRH-ZMC, Tribal Art Centre CCC leh Serchhip CCC aṭangin mi pahnih ṭheuh, Durtlang BSUP aṭangin pasarih, ITI CCC aṭangin panga, Lunglei Pukpui CCC leh Lawngtlai CCC aṭangin mi pakhat ve ve an chhuak.

Mizoramah Covid-19 positive mi 4,008 hmuh chhuah a ni tawh a, mipa 2,953 leh hmeichhia 1,055 an ni. Nimin tlai dar 5 thleng khan mi 3,820 (95.31%) chhuahtir an ni tawh a, mi pasarih (0.17%) thi tawhin, enkawl mek mi 181 (4.52%) an awm.

Mizorama Covid-19 positive hmuh chhuah tawh mi 3,994 zinga mi 1,894 chu Mizoram chhunga kái an ni a, mi 2,114 chu state páwn aṭanga rawn lût an ni.

December 10, Ningani khan Mizoramah swab sample 1,210 endik a ni a; ZMC-ah mi 391, TrueNAT-PCR hmangin district pariatah mi 220 leh RAT hmangin district 11-ah mi 599 endik a ni. Mi 1,210 zingah Covid-19 positive mi 14 (1.16%) an awm.

Hripui vei hmuh thar zinga paruk chu Mizoram chhunga kái an ni a, pariat chu state páwn aṭanga rawn lut thar an ni thung. Tualchhunga kaite chu natna (Covid-19 symptom) lang chhuak vek an ni a, hri kài ṭanna hriat loh pali an awm bawk.

Mizoram aṭanga swab sample 1,62,246 endik tawh aṭangin Covid-19 vei mi 4,008 hmuh chhuah a ni tawh a, chu chu endik tawh aṭangin 2.47% a ni. 

Sorkar thuchhuah tarlan danin, ZMC laboratory-a RT-PCR hmanga hmuh chhuahte chu hnam dang mipa kum 19-35 inkar, SLT Infracon hnuaia thawk, Jharkhand aṭanga tun hnaia rawn lut, Maubuang rama company camp-a inkhung lai an ni a, symptom nei an awm lo.

TrueNAT-PCR hmanga hripui vei hmuh chhuahte pawh Lungleia BSF sipai hnam dang vek, kum 27, 29 leh 52 an ni a, quarantine facility-a khung hran lai niin, symptom nei lo vek an ni.

RAT hmanga Covid-19 positive hmuh thar mi paruk chu mipa pahnih leh hmeichhia pali an ni a, naupang kum 6 mi pakhat telin, a bâk zawng puitling an ni. An vaiin Mizoram chhunga kái an ni a; Covid-19 symptom nei vek an ni bawk. 

RAT hmanga hmuh chhuahte

Laipuitlang - 1: Hmeichhia kum 23, Civil Hospital, Aizawla inentir tura kal, symptom a neih vanga sample endik, hri kài ṭanna hriat rih loh.

Melthum - 2: Hmeichhia kum 20 & 43. Aizawla private hospital pakhata inentir tura kal, symptom an neih vanga sample test; hri kài ṭanna hriat loh.

Sihphir Venghlun - 2: Mipa kum 41, hmeichhe kum 6, pafa an ni. Hri kaina hriat, symptom an nei ve ve.

Mámpui, Lawngtlai dist. - 1: Mipa kum 35, free clinic-a inentir tura kal, symptom a neih vanga sample endik; hri kai ṭanna hriat loh.