Mizoramah Covid-19 vei dam leh 402 an chhuak tawh

August 19, Nilaini khan ZMC laboratory-ah leh Rapid Antigen Test (RAT) hmangin Covid-19 vei mi eng emaw zat hmuh belh a ni a, nimin khan Zangena Filling Station-a thawk pakhatin a vei tih hmuh chhuah a ni. Lunglei Civil Hospital laboratory-ah hmuh chhuah thar a awm lo a, Aizawla random test-a mi 215 endikah hripui vei an awm lo. Nimin khan hripui vei dam tawh mi 18 chhuahtir a ni thung.

Covid-19 vei nimina chhuahtirte chu - Beraw­tlang CCC aṭangin mipa pahnih (civil mi), Zokhawsang CCC aṭangin Assam Rifles mi pali, Lengpui CCC aṭangin mipa pakhat (civilian), Thenzawla AYUSH Hospital CCC aṭangin BSF sipai panga leh Tribal Art Centre CCC aṭangin BSF sipai paruk an ni. Mizorama Covid-19 vei hmuh chhuah tawh, ICMR data portal-a thun tawh zat chu mi 874 an ni a, chu'ng zinga mi 402 (46%) chu chhuahtir tawh niin, la chhuak lo mi 472 (54%) an awm. La chhuak lo zingah endik nawnnaa hripui vei tawh lo tih finfiah an awm nual bawk.

Nimin khan Rapid Antigen Test hmanga swab sample endiknaah Zangena Filling Station, Ramhlun North, Aizawla thawk mipa kum 23-in Covid-19 a kai tih hmuh chhuah a ni a; amah hi Covid-19 symptom a neih avanga inringhlela inenfiahtir a ni. Nilaini khan ZMC-ah RT-PCR hmangin mi 481-te swab sample endik niin, Co­vid-19 vei hnam dang mipa pakhat, kum 51 mi, Bawngkawn­a chêng hmuh chhuah a ni a; khung hran mek niin, quarantine faci­lity aṭanga kai nia hriat a ni.

August 19 vêk khan RAT hmangin Aizawl, Lunglei, Siaha leh Ko­lasib district-ahte mi 368 endik an ni a, Kolasib district (Vairengte)-ah hripui vei mi 12, hnam dang driver/handyman vek hmuh chhuah niin, kum 17-48 inkar, Assam leh Meghalaya mite an ni. Vairengtea hripui vei hmuh chhuah thar mi 12-te hi ICMR data portal-a thun tawh chin a ni. Nilaini chhuna mi 10, Nilaini zan lama mi pakhat leh nimin chhuna mi paruk hmuh chhuahte chu ICMR record-ah thun a la ni loa thu dawn a ni a; hei vang hian Covid-19 vei tawh zat record-ah belh a la ni lo. Vairengte checkgate-ah hian nimin tlai dar 5 thleng khan RAT hmangin Mizorama lut tur mi 5,074-te swab sample endik a ni tawh a, chu'ng aṭang chuan Covid-19 vei mi 86 hmuh chhuah tawh a ni.