Governor hoin State Day lawm a ni: Hmasawn turin remna a pawimawh - Governor

Nimin khan state atana Mizoram puan a nih champha (State Day) chu Mizoram hmun hrang hrangah lawm a ni a, Aizawlah chuan governor Dr Hari Babu Kambhampati hoin Vanapa Hall-ah lawm a ni. Governor chuan hmasawn turin remna a pawimawh hmasak thu a sawi.

Governor chuan, kawng tin­renga hmasawn turin remna leh muanna a pawimawh hmasa ber tih sawiin, "Chumi dawtah chuan sorkar ngelnghet a pawimawh. Heng thil pawi­mawhte hi Mizo­ramin a nei ve ve a, hruaitu tharte pawhin theihtawp chhuah an tum nen, Mizoram tan beiseina êng a awm mek," a ti.

Dr Hari Babu Kambhampati chuan, Chief Minister-in a lo puan tawh ni 100 chhunga tihhlawhtlin tur chak taka kalpui a nih avangin phurawm a tih thu a sawi a, "Sorkar thar hnuaia kut hnathawktute chawikan tumna, kan thil neihsa hman ṭangkai, sum leh pai renchem leh a ṭul loa sum hman tihtawp leh hmalakna dangte hi a ṭha hle," a ti a, hengte hian hmasawnna kawngah a hruai tur thu a sawi.

Mizoram chuan hun rei tak buaina tuar mah se, remna leh muanna thuthlung ziah a nih hnuaah kum 37 lai chu India rama state ralmuang ber a nih mek thu sawiin, "Mizoramah inthlanpui felfai, muanawm leh thianghlim taka kan hmachhawn ṭhinte leh House chhungah MLA-ten zahawm takin ro an rel ṭhin hi a entawntlak hle. Hmundangah chhuang takin ka sawi ṭhin," a ti.

Governor sawi danin, remna thuthlung June 30, 1986-a ziah a nih hnuin remna leh muanna awm nghalin, State of Mizoram Act 1986 hmangin Mizoram chu state puitlingah hlankai a ni. Mizoram chu state 23-na pek a ni mai lo a, a bik taka a inrelbawlna atan India Danpui chhungah Article 371-G siam sak a ni. Mizoramin state pang­ngai angin February 20, 1987 khan bul a ṭan.

Khualzahawm chief minister Lalduhoma chuan, Mizoram state a nih hma kum 25 khan state dangte chuan kawng tinrengah hmasawnna rahbi an lo tuk tawh tih sawiin, "Hmasawnna ruhrel ṭha tak takte an lo din tawh. Kum 25 chhung hian mumal takin India ram chuan hmasawnna programme 5- year plan vawi 5 lai a kalpui daih tawh. Heng hun hlu tak, hmasawnna programme tam tham tak kan hloh hnuah midangte hnuah bul kan ṭan avangin kalmuang thiang kan ni tawh lo," a ti.

Lalduhoma chuan midangte umphak tur chuan midangte kal aia kal chak a ngai tih a sawi a, "Midangte aia thawh tam leh thawhrim a ngai. Kan ram kalzelna turah leh kan vision-te tihlawhtlin kan tumnaah ke pen sual thiang kan ni tawh lo," a ti a, pen khat kal sual pawh a theih tawh loh thu a sawi.

Thusawitu dang NGOCC chairman Lalhmachhuana, CYMA president chuan remna leh muannain a hrin tel, state puitling ni tura kawng zawh chhoh mekah mipuite pawhin tihtur tam tak an nei tih sawiin, "Kan state ṭhenawm maiah rambuai hrehawmzia hmuh theihin a lang a, rambuai aṭanga remna leh muanna awm thei tura sulsutu leh hmalatu kohhran hruaitu, politician leh sorkar mi pawimawhte chungah lawmthu kan sawi," a ti.

State Day hman theihna tur atana sulsutu leh hmalatu zawng zawngte zahna chibai bukin Lalhmachhuana chuan, "State puitling kum 37 zet kan nih takah chuan puitlinna kawngzawh a ke pen erawh a ṭul takzet tawh," a ti a; sorkar mi pawimawh zawng zawngte chu ngaihtuahna thar nen ram hmasawnna tura hna thawk turin a sawm.

State Day lawmna inkhawm hi chief secretary Dr Renu Sharma-in kaihruaiin, under secretary rank leh a chunglam officer-te bakah NGO hruaitute sawm an ni.