Ngaihdam dila ṭawngṭai beihpui buatsaih : Leiba tipungtu chu eirukna a ni - CM

State Day Celebration Committee buatsaihin nimin khan Lammualah 'Sual ngaihdam dila ṭawngṭai beihpui' neih a ni a; chief minister Lalduh­oma'n hmanpuiin, "Leiba tipungtu chu eirukna a ni a, hengte hi a bo chuan thui tak kan intodelh nghal ang," a ti.

Lalduhoma chuan, Bible-ah Pathianin 'Ka thupekte in zawm chuan hnam zawng zawnga hnam hlun berah ka siam ang che u... hnam tam tak in pûktir anga, nangni chuan in pûk ve lo ang' a tih thu a sawi a, "Vawiinah hian kan sorkar hi leibain min delhbet reng a, pûk chawp hlira inenkawl, ba ngah em em sorkar kan ni. Leiba tipungtu chu eirukna a ni a, hengte hi a bo chuan thui tak kan intodelh nghal ang," a ti.

Budget session neih mek a nih thu sawiin Lalduhoma chuan, "Tuna kan pass turah hian lei kan lo bat tawh rulhna tur, a interest nen cheng vbc. 1,095 kan dah dawn a, chu chu kumin chhunga kan pek ngei ngei ngei tur a ni. Kan budget hi vbc. 10,000 awrh a ni a, chuta ṭanga vbc 1,000 chuang leiba rulha tura a kal ral tur hi a uiawm lutuk. Chutiang dinhmuna din chuan ṭawng huai pawh a har," a ti a; Mizoram chu GSDP aṭanga chhûtin India rama leiba ngah ber a nih reng thu a sawi.

Mizote'n Pathian thu kalpui danah tisa thil, thlarau thil leh khawvel thil an thliar hrang nasa tih a sawi a, "Judate sakhua chuan an nun a tuam chhuak vek a, khawvel thil leh thlarau thil an thlir lo. Chutihlaiin keini chuan thlarau thil leh khawvel thil kan thliar a, Pathian ram kan din hleithei lo. Pathian lal ram dintute khua leh tuite chu an hrisel tur a nih laiin, kan ram hi AIDS leh cancer-ah kan hmingthang a, drugs leh zuin min tibuai a, India rama nupa inṭhen tamna ber kan ni," a ti.