Mizo ṭhalaite central service-a an luh theih nan hmalak zel tum

Mizoram Youth Commission (MYC) chuan Mizo ṭhalaite central service-a an luh theihna atan hmalak chhunzawm zel an tum.

Vanglaini palai zawhna chhangin MYC chairman Malsawmzuala Ralte chuan, Mizo ṭhalaite central service-a an luh theihna atan MYC leh Vision IAS-te an thawhdun mek thu a sawi a, "Vision IAS hi thawhpui zel kan tum. Mah se, a hma-a an lo kalpui loh ang deuha kalpui chinte pawh a awm ang," a ti.

MYC Chairman chuan central service-a Mizo ṭhalaite an luh theihna atana lo ṭanpuina turin Chief Minister hnenah pawisa an dil thu a sawi a, "Budget-te han pass phawtin, kan sum neih dan turte hriat a nih hunah hmalak dan tur a chiang zawk thei ang," a ti a, cheng nuai 50/60 vel an dil thu a sawi.

Chi hniha kal a rilruk thu sawiin Malsawmzuala Ralte chuan, "Tunhnai kum 5 chho vela prelims lo paltlang tawhte chu a hranpa-a coaching pek a, a la paltlang lote pawh a hranpa-a coaching pek nise kan duh," a ti.

MYC Chairman sawi danin, sum an neih hunah Vision IAS-te hian exam an rawn buatsaih ang a, exam-a ti ṭhate chu Delhi-ah a thlawn vekin coaching kaltir an ni ang. Sum awm dan a zirin tirh theih tur zat chu la ruahman tur a ni.