Minister-in IGNOU convocation a hmanpui

Indira Gandhi National Open University (IGNOU) chuan nimin khan IGNOU Regional Centre, Selesihah convo­cation an hmang a, minister Vanlalhlana'n a hmanpui.

Vanlalhlana chuan, thawhrimna leh taimakna rahchhuah degree, diploma leh certificate zirlaite'n an dawng tur chu a lawmpui thu sawiin, "Dam chhunga inzir reng tur kan nih avangin zirna hi duhtawk san mai loin, inzir reng ang che u," a ti.

Dinhmun harsatna avanga zirna sang zawk zir chhunzawm thei lo tur tam tak IGNOU zara inzirchhuak an awm ṭhin tih sawiin Vanlalhlana chuan, "Course hrang hrang zir tur a awm hi thil lawmawm tak a ni," a ti.

Minister hian zirlai hlawhtlinna chang - master degree 580, bachelor degree 561, PG diploma 46, PG certificate 5, diploma 4 leh certificate zirlai 47, an vaiin mi 1,243-te hnenah degree, diploma leh certificate a hlan a ni.

IGNOU Regional Centre, Aizawl hi kum 2000-ah din ṭan niin, tunah hian an hmunpui Selesih, Aizawl-ah hian thawktu mi 8 an awm mek.

Mizoram district 10-ah inzarphahin learner support centre 24 leh academic counsellors 201 an nei a ni.