State pawnah State Day lawm
Nimin khan Kolkata leh Telangana-ah Mizoram State Day lawm a ni a, state pahnih governor-te huaihawta lawm a ni.
Kolkata Raj Bhavan-ah West Bengal Governor Dr C V Ananda Bose huaihawtin Mizoram State Day leh Arunachal Pradesh State Day lawmna hun hman a ni a, Kolkata-a sorkar hnathawk Mizo awm te, Mizo Welfare leh zirlai hruaitu eng emaw zat an tel.
Governor hi hna ṭul dang avanga a awm remchan loh avangin adviser to governor Dr SK Patnaik hoin hun hmang a ni a; Mizoram aiawhin joint resident commissioner Jacob Lalawmpuia leh David Z Chongthu,IRS-ten thu an sawi.
Mizoram governor Dr. Hari Babu Kambhampati hnen aṭangin ram pawna Mizo awmte tana State Day thuchah video clip tihchhuah a ni.
Telangana-ah chuan Governor Tamilisai Soundararajan hoin nimin zing dar 8:30 khan Raj Bhavan, Hyderabad-ah Mizoram State Day lawm a ni.
Hyderabad Mizo Association-ten cheraw an entir a, Governor hi Mizo puan ‘Ngotekherh’ an hlan bawk.