MLA hoin MUP inkhawmpui

Mizoram Upa Pawl (MUP), Aizawl West-III area chuan nimin khan MPSOA Hall, Bungkawnah khawmpui an hmang a, bialtu MLA VL Zaithanzama'n a hmanpui.

VL Zaithanzama chuan, ram changkang apiangah upate'n ngaih­hlut leh ngaih pawimawh an hlawh tih sawiin, "Thluak fim kan tih hun hi kum naupang lam ni loin, kum upat hunah a ni ṭhin. Naupan laiin nu leh pa kan ngaisang ṭhin a, kan han leikang a, nu leh pa ngaih hniamna leh sitnate a awm fo ṭhin. Kum a tam chhoa, an hlutna kan hre tial tial zel," a ti.

Pa ràwn nih tling tur chuan kum upat ve deuh a ngai ṭhin tih sawiin VL Zaithanzama chuan, "Upate hlutna pawh hrethiam tur chuan tawn­hriat ngah ve phawt a ngai. Upate aṭanga Mizo zia leh nunphung ṭhate hriain kan chhawm nung zel," a ti a, Mizo sakhua leh nunphung, Mizo nihna tak hi upate aṭanga in rochun leh chhawmnun zel a nih thu a sawi.

West-III Bialtu MLA chuan, upate chu ram rorelna leh inkaihhruaina kawngah pawh khaipa an ni lo thei lo tih sawiin, "Ṭhangthar mithiam tak tak karah pawh Upa thu a fing ṭhin an tih angin an kaihhruaina tel loin ram a kal thei lo," a ti.

Aizawl West III Area MUP khawmpui hi hun hnihah ṭhen a ni a, zanriah an kilho nghal.