Sorkarin thlànmual inṭawm tur a ngaihtuah - Dy. Chief Minister

UDPA changtu deputy chief minister Tawnluia chuan nimin khan cheng nuai 480 sénga sak tur Bungkawn Community Hall lungphûm a phúm a; sorkarin thlànmual inhman ṭâwm tur a ngaihtuah thu a sawi.

Lungphùm puala inkhawm MPSOA building-a neihah Tawnluia chuan, "Sorkarin kawng hrang hrangin khawpui tihhmasawn a ngai pawimawh. UDPA hi kum 2006-a din chauh ni mah se, nasa takin mipui tan hna an thawk. Ruhrel an sak tawhte leh mipui hman ṭâwm theih hmunhma an sakte ṭangkai takin mipuiin an hmang a ni," a ti.

Dy. Chief Minister chuan, Aizawl khawpui tan thlànmual inhman ṭâwm tur hmun paliah tal buatsaih turin sorkarin ngaihtuahna a séng tih sawiin, "Mitthi inphûmna hmun hi veng bil angin min daih rei dawn lo a, common cemetery angte hi kan neih vat a ṭul dawn," a ti a; YMA-te chu ngaih­tuahna sènpui turin a sáwm.

Bungkawn Community Hall sak tur lungphûm inkhawm hi UDPA secretary Dr C Vanlal­ramsanga'n a kaihruai a, bialtu MLA VL Zaithanzama pawh a tel.

Hall hi UDPA department enkawlna hnuaiah State Plan Fund aṭangin cheng nuai 480 sénga sak tur a ni a, RCC frame structure-in chhawng ruka sak tur a ni.