District tinah State Day lawm a ni

Nimin khan Mizoramin state nihna a neih champha vawi 37-na a ni a, district hrang hrangah MLA-te leh district bawrhsap hoa hman a ni. District hrang hranga State Day lawmnaah hian sorkar, kohhran, tlawmngai pawl aiawhte bakah, zirlai leh zirtirtute'n State Day Celebration Committee ruahman angin State Day pual ṭawngṭai rualna an hmang nghal a ni.

LUNGLEI

Lungleiah chuan Convention Centre-ah disrtict bawrhsap Ramdinliani kaihhruaiin hman a ni a; Lunglei North bialtu MLA V Malsawmtluanga chu khuallian niin, Lunglei West bialtu MLA T Lalhlimpuia chu khualzahawm a ni.

V Malsawmtluanga chuan, "Mizoramin state puitling a nih theihna tur leh a chhunga chengte'n ralmuang taka kan awm theihna tura mahni chaw thleng leibua a, a thâ leh zung nasa taka sengtu, vawiina kan chief minister lo ni ta Pu Laduhoma chungah pawh lawmthu ka sawi. Kan in leh lo, kan incheinate a changkan hle laiin, hmasawnna ruhrel tak tak leh ei leh bar-a intodelhna kawngah erawh chuan hmabak kan la ngah hle," a ti a; ZPM sorkar chuan moral reformation a ngaih pawimawh thu a sawi.

State Day lawmna programme zawhah Saikuti Hall-ah LMC chairman Lalzuithanga kaihhruaiin State Day pual ṭawngṭai rualna neih a ni.

SIAHA

Siaha bawrhsap Lalhmunsanga Hnamte hoin nimin zing khan Vaihpi khelmualah Siaha District State Day of Prayer Committee bultumin 'Mizoram State Day of Prayer' neih a ni a; Siaha District State Day of Prayer Committee chairman Rev. C Beima kaihhruaiin ṭawngṭai rualna neih a ni.

CHAMPHAI

Champhaiah chuan State Day hi IPR Auditorium-ah district bawrhsap James Lalrinchhana hoin hman a ni a; "State Day a lo thlen hian Pathianin Mizo hnam leh Mizoram a din chhuah dan chanchin ngaihtuah chhuah fo a ṭul," a ti.

James Lalrinchhana chuan, "Ram chu Lapa ta a nih avangin miin ram tana hna a thawh chuan Pathian rawng a bawl tihna a ni," a ti a, kohhran, tlawmngai pawl, party leh sorkarin thawhhona ṭha a neih chuan ram a ṭhan tur thu a sawi.

Champhai District Sport Complex-ah pastor K Lianmunga'n kahruaiin State Day of Prayer hman a ni.

KOLASIB

Kolasib IPR conference hall-ah district bawrhsap John LT Sanga hoin State Day lawm a ni a; Kolasib Kohhran Hruaitute Committee (KKHC) huaihawtin Kolasib Ṭumpui Field-ah ram tana ṭawngṭai hona hun, State Day of Prayer buatsaih a ni.

Bawrhsap chuan, "Mizoram humhim leh tihhmasawn te, state nihna vawn nun zelte hi khua leh tui zawng zawng mawhphurhna a ni a, Mizoram state zalen leh ralmuang a nihna chu a ṭha zawnga hmasawn nan hman thiam a pawimawh," a ti.

SERCHHIP

Serchhipah chuan DC conference hall-ah bawrhsap David Lalthantluanga hoin lawm a ni a; Serchhip Auditorium-ah ram tana ṭawngtai rualna (State Day of Prayer) hman chhunzawm nghal a ni.

David Lalthantluanga chuan, "State nihna hi kan ngaihhlut thiam a, ralmuanna kawngah chauh lo pawh state dangte tana entawn tlaka inpho chhuah kan tum zel a pawimawh. Kum 37 zet state puitling dinhmuna kan din hnuah hmasawnna tur erawh kan la ngah hle a, taima taka hna kan thawh a, dik leh rinawm taka thil kan tih phawt chuan intodelh tur leh tun aia chak zawka hmasawn tur hian theihna kan nei," a ti.

LAWNGTLAI

Lawngtlai DC conferenec hall-ah SDO (Sadar) Margaret J Vanlalremmawii kaihhruaiin Mizoram State Day 2024 lawm a ni.

Khuallian additional DC Abraham Beirazi Khithie chuan, "MNF leh sorkar laipui inremsiamna avangin Peace Accord siam a ni a, state dinhmuh luah tura Mizoram mipui tawrhna te, huaisenna leh inpeknate chuan ṭhangtharte thinlungah ram leh hnam hmangaihna pian chhuah tir zel se," a ti.

CYLA Playground-ah State Day of Prayer Organising Committee bultumin ‘Sual ngaihdam dila ṭawngṭai rualna’ hun hman a ni.

MAMIT

Mamitah chuan bawrhsap VL Remliana hoin DC conference hall-ah Mizoram State Day hman a ni a; VL Remliana chuan, "State puitling kan nih angin kawng engkimah puitling zia kan put a ṭul a, mahni intodelh a, remna leh muanna kan neih hi chhawm nung zel ang u," a ti.

VL Remliana chuan state puitling nia kan chanvo leh mawhphurhna hlen kawngah a hlutnate hre reng chunga sorkar hnathawkte, tlawmngaipawl aiawhte pawhin kan theihna zawn ṭheuhah ṭan kan lak thar a ṭul thu a sawi.

SAITUAL

Saitualah chuan Saitual College Auditorium-ah State Day hman a ni a, Siatual BCM Pastor Joseph Lalrammuana kaihhruaiin Saitual Public Playground-ah ṭawngṭai rualna neih a ni.

Dr Lalngura Tlau chuan, "Hun lokal chho zelah mahni nihnaa chian lohnain Mizote min tuam chho mek a, nghenchhan tur zawngin kan buai. Hengte avang hian Mizote'n hma kan sawn a, kan inpumkhat a pawimawh takzet," a ti a, engtiklai pawha remna leh muanna hlut zia hriaa vawng nung zel turin kalkhawmte a chah.

KHAWZAWL

Khawzawlah chuan State Day hi DC conference hall-ah bawrhsap K Lalrohlua hoin hman a ni a; Khawzawl District State Day of Prayer Organising Committee chairman Rev. David Saiṭhuama Pachuau kaihhruaiin Mualvawm Ground-ah State Day pual ṭawngṭai rualna hun hman a ni.

K Lalrohlua chuan, Mizoramin state dangte neih ve loh Article 371 (G) a nei chu thil chhinchhiahtlak a nih thu sawiin, sorkar hnathawk kalkhawmte chu he dan bung hi uluk zawka zir chiang a, an ni tin hnathawhna hmunah hnam ziarang leh tihphung vawng nung chunga hna thawk ṭhin turin a chah.

HNAHTHIAL

Hnahthialah chuan DC conference hall-ah bawrhsap Chuauhnuna hoin State Day hman a ni a; Bawrhsap chuan, "Mizote tan State Day hi a pawimawh em em a ni," a ti. Sorkar hna thawkte chuan CCS conduct rules-in sorkar hna thawkte awm dan tura a tarlan - rinawmna, dikna, felna vawn nun te, mahni hnaa inpumpekna te, sorkar hnathawk tiha mawi lo engmah tih loh tur te, thawh chhan mipuite mithmuha mawi lo a awm lo turte a chah.