KHAWTHLIR

NGO-in punkhawm huaihawt dawn

NGO Coordination Committee (NGOCC) chuan Indo- Myanmar ramri hung (border fencing) leh Free Movement Regime (FMR) hlih duh lohna punkhawm vawiin chhun dar 1 hian Vanapa Hall kawtah an buatsaih dawn. He hun hi MZP president H Lalthianghlima'n kaihruaiin, NGOCC chairman Lalhma-chhuana, CYMA presi-dent-in thu a sawi ang.

Tuitla hmu

February 19, Thawhṭanni chhun dar 1 vela Bairabi North huamchhung Tlawng Lui, Licheng kaia tla VL Chhanchhuaha (18) s/o K Lianmawia, Chhingchhip Mualpui leh H Vanlal­chhanchhuaha (18) s/o Lalhruaizela, Champhai PHE Vengte ruang chu nimin chawhma khan hmuh a ni. H Vanlalchhanchhuaha ruang hi chawhma dar 10:15 velah an tlakna aṭanga metres 5 velah hmuh a ni a, a hnu chawhma dar 10:45 velah VL Chhanchhuaha ruang an hmu ve leh. Tuitla zawng hian Bairabi khawtlang bakah Sairang tuithiamte an thawk chhuak. Vanduaina tawkte hi an pate Bairabi Rel Station-a buhfai load tura kal zui an ni.

Lehkhabu tlangzarh

H Lalroluahpuia lehkhabu ziah, 'Embarking On The Ethereal Quest' tih chu nimin khan Jubilee Bible School (JBS), Serkawn, Lungleiah JBS principal Rev. K Lalbiakenga'n Pathian hnena hlanin a tlangzarh. Lehkhabu hi Rs. 250 man niin, BCM Bookroom, OM Books leh Amazon aṭangtein a lei theih.

Sangha khawi zir

Ni nga awh tur Training on Aquaculture for the Development of Aquaculture under NEH/TSP chu ICAR - Central Institute of Fisheries Education (CIFE), Mumbai, Maharashtra bultumin February 19, Thawhṭanni aṭang khan KVK Lengpui, Mamit district ah neih a ni a, Fisheries secretary C Lalzahngoa'n a hawng.

Heroin man

Assam Rifles leh Excise & Narcotics dept. ṭangkawp chuan February 19, Thawhṭanni khan Zotlang Veng, Aizawlah Saithangpuia (39), ITI Veng, Aizawl nia inchhal hnen aṭangin heroin gram 60 an man. Heroin gram 60 hi cheng nuai 42 man hua chhut a ni.