Sorkar dan bawhchhe tawh lo turin Mizoram sorkarin AR DIG a hriattir

Mizoram sorkara Home department chuan August 19, Nilaini khan Assam Rifles DIG Brig. Vinod S hnenah lehkha thawnin, August 18, Thawhlehni tlaia AR sipaite'n Vairengteah Mizoram sorkar dan an bawh­chhiat thu a ziak a; chutiang thil chu tun hnuah thlentir tawh lo turin a chah. Mipui hriat turin thil thlen dan sawifiahna an tichhuak bawk.

India leh Myanmar inrina vengtu AR-te chu Mizorama an chêt velnaah dan buai an ni ngai lo a, an operation chu sorkarin a tlangzarh ngai lo tih tarlangin Home chuan, "August 18, 2020-a an khawsak dan erawh hi chu sorkarin a hrethiam lo hle. Tum lâwk ang hrima Aizawl aṭanga Capt. Dheerendra Yadav leh sipai 25 zetin Vairengte checkgate-a an sipai dang 15 hruai luh luih tuma an thawk thla khan Vairengte mipui a tithlabar a, a pawi hle a ni," an ti.

Home department chuan, "Vairengte checkgate-ah hian officer-in-charge leh Mizoram police-te lakah an inhrosa nasa hle. Sipaite hi inthurualin Vaireng­te checkgate an su tlang lui ta a ni," an ti a; AR-te chêt dan chu The Mizoram (Contain­ment and Prevention of COVID-19) Ordinance, 2020 hnuaia Section 4(5) leh dan hrang hrang bawhchhiatna a nih avangin sorkarin a ngai thutak hle tih a tarlang.

Assam Rifles pawhin Nilaini thuchhuah an siam a, central armed police force-te chu Covid-19 vanga lockdown kaihhnawihah MHA-in India ram pumah a bika kaihhruaina a siamsak a ni tih an tarlang a, "Mizoram sorkarin Mizorama an lut tur a lo dang hi MHA kaihhruaina bawhchhiatna a ni a, Myanmar ramri vengtute lo dan hi ram himna ngaihtuahin ngaihthiam theih a ni lo," an ti.

AR thuchhuah chuan, Mizoram sorkarin khuahkhirhna a siamin AR-te a huam chu ramri venhimna kawnga hmalakna tihbuaina a nih thu a tarlang a; Vairengte checkgate-a thil thlen dan a sawifiah nghal bawk. AR mi leh sate'n mipui van­tlangah Covid-19 an kai darh lo nia sawiin AR thuchhuah chuan, "Covid-19 veite chu Zokhawsanga quarantine centre-ah dah zel an ni a, state sorkar tan harsatna siam a ni lo," an ti a; Myanmar ramri ven kawngah village task force-te an inhnuhdawh tawh avangin an tan hna a tam phah tawh hle tih an tarlang bawk.

Home department-a under secretary Zahmingthanga tarlan danin, AR sipaite Vairengtea an chet dan chungchanga AR lam aṭanga sawifiahna, social media-a darh chu Capt. Baby Lalduhsangi, 23 Sector AR siam, Francis Lalmalsawma Sailo, Zarkawtin social media-a a thehdarh a ni. Home department chuan, hripui lakah Mizoram mipui an him theih nan Mizoram sorkarin theihtawpin hma a la tih tarlangin, "March 11, 2020 aṭangin state dang nena inkalpawhna kawngpui ṭhenkhatte khàrin, rawn lut tur reng reng chu Home department phalna nei hmasa turin thupek chhuah a ni," an ti a; sorkar thupek chu mi zawng zawng huap a nih thu an tarlang.

Sorkar thupek chu mipui leh sipai lamte pawh an zawm ṭhat hle laiin AR-te chuan tlàwmah an la emaw tih turin dilna an thawn tlai fo thu tarlangin Home chuan, "A chang chuan tlai khawhnu, Vairengtea an luh ṭan tawh hnuahte an rawn thawn ṭhin. Home department chuan zankhaw tairêk leh office chawlh níahte pawh lo dawngsawngin phalna an pe ṭhin," an ti. Home department tarlan danin, ni tin mamawh phurte Vairengteah dan khawtlai luih an ni ngai lo a, mPASS registration tih leh medical screening paltlang erawh a ngai. AR-te'n an ni tin mamawh phurh nan private contractor an hmang a, civil mi leh sipai thliar loin mPASS registration an tihfel chuan kaltir an ni ṭhin. Gate-ah harsatna siamsak an nih hriat a ni lo a, AR-te ration chhiat thu Mizoram sorkar beng a la thleng ngai lo.

Ministry of Home Affairs phalna angin, sorkar laipui kaihhruaina chhuah aia khauh zawkin Mizoram sorkarin kaihhruaina a siam ṭhin a, Mizorama lut turte chu Mizoram mi leh sa dik tak pawh ni se, Home phalna la loin luh phal a ni lo. Chu chuan Mizorama hmunhma nei sipaite pawh a huam vek a ni. Mizoramah hian armed force dik tak - Army Medical Corps, Army Recruiting Office leh Indian Air Force-te an awm a, paramilitary force zingah - AR, BSF leh CRPF bakah, BRO-te an awm tih sawiin Home chuan, "Home department chuan vawiduailo inter-state movement titlem turin a ngen a, mahse, AR hian an ngai pawimawh lo. Heti chung hian an pawimawhna hriain Home chuan May 1 aṭanga August 10 inkar khan AR mi leh sa 1,124-te Mizorama luh phalna a pe a ni," an ti.

An tarlan danin, Mizoramah Covid-19 vei an pun avang leh a tam ber chu paramilitary force an nih avangin, Chief Minister-in Prime Minister hnenah August 2, 2020 khan lehkha a thawn a, August thla chhung zawng Mizorama sipai luh leh chhuah titawp turin a ngen a ni. August 19, Nilaini thlenga Mizorama hripui vei hmuh tawh mi 860 zingah sipai 371 an tel a; mi 117 chu lirthei khalhtu, mi 366 chu civil mi leh mi paruk chu frontline worker an ni. Mizoramah AR battalion pathum a awm a, Indo-Bangla border vengtu Border Security Force (BSF) battalion pali an awm a ni.