Synod Inkhawmpui 2020 a ṭiak Pastor thar 15 nemngheh an ni

Mizoram Presbyterian Kohhrana inkhawmpui lian ber, Synod Inkhawmpui, December 8, 2020-a ṭan chu nimin khan a ṭiak. Inkhawmpui hian kum 2021-22 chhunga Mizoram Synod budget atan Rs. 3,79,20,14,000 (vbc. 379) a pawm a; nimin khan pastor atan mi 15 nemngheh an ni.

Synod Inkhawmpuiah hian December 10, Ningani khan rorel zawh a ni a, kum 2021-22 chhunga budget atana an pawm tâk Rs. 3,79,20,14,000 chu kum 2020-21 budget Rs. 3,74,95,25,000 aiin Rs. 4,24,89,000-in a tam zawk a, a punna rate chu 1.13% a ni. Kum 2021-22 budget zinga Rs. 2,42,84,10,000 chu Pastoral-ah dah a ni a, Rs. 1,36,36,04,000 chu Mission-ah dah a ni thung.

Nimin khan chawhmaah nemngheh inkhawm neih a ni a, probationary pastor ni lai mi 15 chu pastor atan moderator Rev. Dr C Lalhlira'n a nemnghet a, an zinga panga chu Synod Mission Board hnuaia thawk tur an ni. Pro. pastor atana lak thar mi 18-te pawh Moderator-in a dahnghet bawk.

Synod moderator kal chhuak Rev. R Lalchangliana'n rawngbawlna report a pek danin, Mizoram Synod hnuaia presbytery 40, pastor bial 192, kohhran 830, branch church 58 leh preaching station/fellowship 30 an awm a; pastor/minister 269 awmin, chu'ng zinga 192 chu bial vawng an ni a, kohhran upa 5,881 an awm. Kohhran member 6,20,311 an awm a, mipa 3,03,023 leh hmeichhia 3,17,288 an ni. Kum 2020 chhungin an member thi mi 2,328 an awm.