IMA leh IDA-te'n Ayurvedic doctor-te Surgery course zir phalsak an duh lo
Indian Medical Association (IMA) leh Indian Dental Association (IDA), Mizoram Branch hruaitute chuan nimin khan Aizawl Press Club-ah thuthar thehdarhtute an kâwm a; Ayurveda graduate zinga post graduate zirte tana surgery course zir phalna pek an duh loh thu an puang.
IMA president Dr Rosangluaia chuan, Central Council of Indian Medicine (CCIM) chuan November 19, 2020 khan Ayurvedic post graduate zirte tan surgery an zir theihna tur order a chhuah thu a sawi a, "Kum hnih an training hnuah thil chi 58 zai thei tura tih an ni a, specialist tih an ni ang. Kum hnih training hi a rei lo lutuk," a ti.
Dr Rosangluaia chuan, AYUSH doctor-te leh allopathy doctor-te nen line dang daih an nih thu sawiin, "An line leh system lo an zir loh avangin an practice a rem loah kan ngai. Tun hnaiah sorkar laipuiin modern medicine kalphung tibuai thei zawngin thutlukna a siam nual a ni," a ti a; mahni line ve veah chak takin kal ve ve mai ni se ṭha an tih thu a sawi.
IMA leh IDA hruaitute chuan, AYUSH doctor-te'n herbal damdawi bâk an chawh theih loh thu sawiin, "Mi lo zai pawh ni se, eng damdawi nge an chawh ang? Kan duh loh ber chu mipuiin an tawrh a ni. He dan hi sût leh ngei ni se kan duh. Vawiin hian India ram pumah non essential, non Covid health service-te chu zing dar 6 aṭanga zan dar 9 thleng an khâr vek a ni," an ti.
IMA leh IDA hruaitute sawi danin, Mizoramah chuan lungawi lohna lantir ve mah se, mipui tana harsatna thlen lo zawngin an lantir a, hna an thawhna hmunah badge dum an bel a ni.
IMA-in central thutlukna an duh lohte
→ NMC Act notification: He thu chhuak hian medical doctor ni ve lote tan primary health care-ah medicine practice thei tura licence pek theihna dan a siam. Chu'ng mite chu community health provider tiin nihna a pe a, laboratory technician aṭanga optometrist-te thlengin an ni thei dawn. Natna chi hrang hrang enkawl theihna - ICU, critical care, operation theater, labour room leh emergency-ah thlengin enkawl phalna a pe dawn a ni.
→ National Education Policy: He dan hian dedicated health university-te tiboin, medical course hrang hranga luh theih dan kawng a hawng dawn. Medical zirbingna leh thiamna chawhchawrawi a ni tawh ang a, thiamna dik leh famkim nei lo doctor a hring chhuak ang. Chu chu crosspathy tih a ni a, damlo tan a pawi thei hle dawn.
→ National Commission for Allied and Health Care Bill 2020: Hei hian paramedics-te tan medical practice theihna tur kawng a hawnsak dawn a ni.
→ CCIM Notification: Central Council of Indian Medicine, Ministry of AYUSH hnuaia awm hian thla hmasa maia notification a chhuahah chuan AYUSH hnuaia Ayurveda graduate-te tan post graduate zirte tan surgery course an zir phalna a pe leh. General surgery, ENT leh ophthlamology line-an zir a phal dawn a, surgery thiamna nei ve lote tana tih mai mai chi loh damlo zai, mit paih (cholecystectomy), vun bel (skin grafting), pumpui pawp zai, rílphír zai, tilmu paih leh a dang tam tak bakah, eye surgeon-te tan lo chuan zai mai mai loh chi cataract surgery leh intraocular lens vuah te, ENT surgeon-te lo chuan an zai mai mai chi loh hnar ngul kawi siam ṭhat te, bengdár chhia repair te, tonsil paihte zirtir a tum. Dental surgeon-te lo chuan an khawih chi loh root canal treatment thlengin an zir theih nan kawng hawn tum a ni.