House-ah hmunphiahin sawi a hlawh: A leitu turten beisei an pha lo - CM

Nimina Assembly session-ah eptu member-te chuan an intiam anga hmunphiah lei loah sorkar an puh a, "Chhungkaw sang tel mangangin an awm," an ti. Chief minister Lalduhoma chuan hmunphiah lei tura an tihten beisei an phak loh thu a sawi.

Hmunphiah hralhna chungchang hi leader of opposition Lalchhandama Ralte hoin MNF member-ten an sawi chhuak a, "Sorkar bituk aia tlem tê têin an lei. Kan inzuar a, a leina tur rate bituk a ni. A tihral theih dan danin tiral rawh u tih a ni leh si. Hetiang hi sorkar kalphung tur a ni dawn em ni?," an ti.

Opposition member-te chuan term hmasaah a chhiatlai berin hmunphiah hring man kg. khat Rs. 40 aiin a tlahniam mang lo tih sawiin, "Mi harsa tak takten nghakhlel taka an thlir laiin a hring kg.-ah Rs. 15-te a ni," an ti a, hun dang, ṭum danga tih dan zirchiang loin pawng kalpui tawp a ni em tiin an zawt.

Tax holiday puan a nih laiin transit pass-ah kg. khatah Rs. 1 lak a nih leh tho thu sawiin opposition party-te chuan, transit pass atana pawisa lak leh hmunphiah rate hniam tak taka hralhte hnenah price support pe turin sorkar hotute an ngen.

Chief Minister chuan thlai thar pali lei turin an intiam tih sawiin, "A rate tur pawh kan puang. Hmunphiah hring erawh kan lei loa, lei pawh kan lei ngai dawn. Financial year thar aṭanga lei tum nimah se, vote leina atana ruahman ningnawi thlai thar leina atan hmang ang kan ti a ni," a ti.

Lalduhoma chuan, thlai pathumah chuan sorkar rate aia sanga lei duh an awm avangin an buai loh thu sawiin, "Hmunphiah lei tura kan tih RR Associate-in beisei an phak lo a, kan chesual. Sorkar hmasa-a an tih dan thoin mahni buai buain lo buai ru kan ti," a ti a, sorkar kumthar aṭang chuan awmze nei zawkin kalpui a nih dawn thu a sawi.

Sorkarin hmunphiah chingtute price support pek tur a neih thu sawiin Chief Minister chuan, "Engmah record a awm lo. Society lah hmun tinah a awm lo. Chuvangin, a nih nih ni rih mai tehse kan ti a ni. Tin, hmunphiah hring lei tur lo dang leh vau deuh pawl pawh an awm," a ti.

Chief Minister sawi danin, hmunphiah chingtute chu sorkarin an dinhmun a hriatthiampui avangin hun eng emaw chen an insawhnghehna atan royalty lak sak loh ni se, tih a nih angin lak sak an ni lo. Transit pass erawh danin a phût a ni a, transit pass tel loin Vairengte thlang lam a tlang thei lo. Chuvangin, a hniam thei ang lâk a ni.