FMR hlih leh ramri hung duh loin pungkhawm: Central kan dodal zel dawn - NGOCC Chairman
NGO Co-ordination Committee (NGOCC) chuan nimin khan Vanapa Hall kawtah India sorkarin Myanmar leh India ramri hung a tumna leh free movement regime (FRM) a ṭhiah duh loh lantir nan punkhawm an huaihawt a; NGOCC chairman Lalhmachhuana, CYMA president chuan, "Kan inkalpawh theih loh nana ramri min hung sak tumtu central sorkar hi kan dem a, an thiltih tum hi kan dodal zel dawn," a ti.
NGOCC Chairman India sorkarin passport leh visa tel loa inkalpawh theihna dan (FRM) a ṭhiat leh India leh Myanmar ramri hung a tum chu an dem thu a sawi a, "Zofate hi ram hrang hrangah ṭhendarh kan ni a, kan unaute nena zalen taka inkalpawh theihna dan kan neih FRM min ṭhiahsak a, kan inkalpawh theih loh nana ramri min hung sak tumtu central sorkar hi kan dem a, an thiltih tum hi kan dodal zel dawn a ni,” a ti a; FMR ṭhiah leh ramri hung thuah hian theihtawpa dodal turin Mizo mipui zawng zawng a sawm.
FMR ṭhiah a nih theih nana India sorkar chhuanlam ber chu - ruihhlo tawlhruk danna atan te, ralthuam keng helpawl lo lut tur dan nan te, dan loa sumdawnna tihtawp nan tihte a nih thu sawiin Lalhmachhuana chuan, "Heng an thil tihtawp tum hi ramchhung aṭanga thurualpuitu an neih chhung chuan tihtawp tak tak theih a ni dawn lo. Chuvangin ramri hung zawng ni loa kawng danga hetiang titawp tura hmalak hi a fuh zawk. Kan u leh naute nen hian daidanna bangin min hung hrang mah se, kan thinlung an hung tel theih dawn loh avangin thil ṭha lo zawk a thlen phah a hlauhawm,” a ti.
Punkhawm hi MZP president H Lalthianghlima'n a kaihruai a; CYMA general secretary Prof. Malsawmliana kaihhruaiin pungkhawmte'n resolution pahnih - 'Vawiin (21.2.24) a NGOCC huaihawta mipui pungkhawm chuan India sorkarin FMR a hlip leh Indo-Myanmar ramri hung a tum hi ṭha kan ti lo a, kan dodal tak zet a ni' tih leh, 'FMR tih thar leh a nih theihna tur leh Indo-Myanmar ramri hung tum hi ṭhulh a nih theih nana NGOCC hmalakna hi kan thlawp tlat a ni' tih an pawm.
NGOCC Chairman thusawi dangte
▶ Manipur chief minister Biren Singh-a’n India sorkar hnenah ramri hung tura a nawr vanga he thil hi thleng ta niin kan hria.
▶ Mi pakhat duhdan ang ngawta kan kal hian kan lo chhuan ve em em ṭhin he mipui rorelna, democracy hi a âwn ruai ruai a, a kalsual mek niin a lang.
▶ Sorkar laipuiin Act East Policy a kalpui mek laia FMR tihtawp a tum leh si hi thil inkalh tak a ni.
▶ Sorkar laipui chhuanlam - ruihhlo tawlh ruk leh dan loa sumdawnnate hi khawchhak lama kan unaute pawhin lo titawp a, lo insum rih ve turin ka sawm.
▶ Zofate insuihkhawmna atana FMR ṭhiah leh ramri hung tumna hi chak taka kan do tlan zel theih nan kan hmun ṭheuhah kan tih tur ve ve te tiin, kan ṭan tlan zel a ngai.