Governor thusawia lawmthu sawina pawm: A sawi ṭha kan ti vek - Chief Minister

February 19, Thawhṭanni Governor Dr Hari Babu Kambhampati-in Assembly House-a a thusawi avanga lawmthu sawina (motion of thanks) chu sawihoa pawm a ni. Chief minister Lalduhoma chuan, House member-te'n Governor thusawi chu ṭha an ti veka a hriat thu a sawi.

Governor thusawia lawmthu sawina motion hi Aizawl South-III bialtu MLA Brayl Vanneihsangi Tlau-in a pulut a, nimin khan sawiho niin, member eng emaw zatin an sawi hnuah pawm a ni.

Lalduhoma chuan, sorkar hmalak tumna tlangpui Governor-in a sawi chu ṭha an tih vek thu sawiin, "Veilama mite hlei hleiin ṭha an ti. Kan lakah beiseina an nei sang a, a huphurhawm letling zawk. Mah se, kan thawkho anga harsatna kan sutlang ang," a ti.

Mizoram sorkarin sum a nei lo tak tak tih Mizoram mipuite'n hriatpui se a duh thu sawiin Chief Minister chuan, "Keimahni pawh kan in hre mek a, kan inren hle," a ti a, Zoram mipuite chu an harsatna hriatthiampuia kum khat nghak tura a duh thu a sawi.

Leader of opposition Lalchhandama Ralte chuan, "Inrenchemna kan sawilaiin, kan sum leh pai hmanna ṭhenkhat adviser to CM panga, OSD cheng 1 hlawhte en hian, sum renchem ṭulna leh hlauhthawnna Governor hian a nei em ni? tih a awl," a ti.

Governor thusawi chu fimkhurna atana hman a ṭhat thu sawiin Lalchhan­dama chuan, "Thu a sawi mai a tawk loa, a taka hmalak a ngai," a ti a, an zavaia in enna tur a nih thu a sawi.