CSS kalpui leh hnathawh danah mipuite an lungawi tâwk em tih a pawimawh - Lok Sabha MP

Lok Sabha MP C Lalrosanga kaihhruaiin nimin khan Siaha District Rural Resource Centre-ah Siaha District Development Co-ordination & Monitoring Committee (DDCMC)/DISHA an ṭhukhawm a; MP chuan, "Centrally Sponsored Scheme (CSS) kalpui leh hnathawh danah mipuite an lungawi tâwk em tih a pawimawh hle," a ti.

C Lalrosanga chuan, thla thar maiah sorkar kum a tawp tawh dawn tih a sawi a, "Sorkar kum 2023-2024 chhunga line department-te'n CSS an kalpui dan a lungawithlak em tih leh tun dinhmuna hlawhtlinna an neih chu a pawimawh ber a ni a, CSS kalpui leh hnathawh danah mipuite an lungawi tawk em tih a pawimawh hle," a ti a, mipuite mamawh leh chhawr ṭangkai tur hmasawnna ngai pawimawh chhunzawm zel turin department hotute a chah.

Sorkar laipui aṭanga sum lokal ang angte chu ram leh hnam hmasawnna tur a nih thu sawiin Lalrosanga chuan, "A nihna ang taka ram hmangaihna nen hnathawh ṭhin a ṭul hle. A dik lo leh fel lo lai awmte pawh a ṭul angin hotute hnenah thlen zel ang che u," a ti.

Ṭhutkhawmah hian Siaha district-a CSS hnuaia April, 2023 aṭanga kumin March thla thlenga line department-hrang hrangte hmalak tawhna leh hlawhtlinna an neih hrang hrangte tarlan a ni a; harsatna an tawhte pawh hmalam huna sutkian dan tur kawngte an sawiho nghal a ni.