LRSCW Minister-in hmunphiah hring sorkarin a lei loh chhan sawifiah

Land Resources, Soil & Water Conservation (LRSWC) minister Lalthansanga chuan sorkarin hmunphiah hring a leive dawn loh chhan nimina Assembly session-ah a sawifiah.

MNF member Lalchhandama Ralte zawhna chhangin Lalthan­sanga chuan, "Hmun­phiah lei turin sorkarin RR Associates-te hi inremna a siampui hranpa loa, Mizorama hmunphiahte sorkar rate bituk aia hniam loa lei a phalsak mai a ni. Tax lakna tur provision siam tel a ni lo. Transit pass pe chhuaktu EFCC dept. hnenah erawh administrative cost kg. khatah Rs. 1 pek vek a ni ang," a ti.

LRSWC Minister chuan, sorkarin kum 2024 chhung atan hmunphiah ro leina tur rate grade A-ah kg. khat Rs. 100 aia hniam lo leh grade B-ah kg. 1 Rs. 80 aia hniam lo turin a bituk tih sawiin, "Hmunphiah hring hi tiro turin hun leh thâ tam tak senga buaipui ngai a nih avangin sorkar tan a hringa lei a remchang rih lo," a ti a, a hringa hralhna rate pawh bithliah a nih ve tak tak loh thu a sawi.

LRSWC Minister sawi danin, hmunphiah hi zo leh phaiah a thar hun a in ang lo hle. A leitu pawn lam miten Vairengte leh a chhehvela a thar tih an hriat meuh chuan zo lama mi chu a lo chang hman tawh hial ṭhin a ni. He a thar hun in ang lo avang hian a hring rate siam pawh a tih harsat phah.

Market Study Team-te zirchianna aṭanga thil pawimawh tak pakhat lo lang chu, NLUP hlawhchhamna ber pawh a hring nen an buaipui tel vang a ni. Hmunphiah hi a buka hralh a nih avangin a hrin rei theih nan leh buk a rih zawk theih nan tuia chiah mai duh pawlte an lo awm ṭhin. Hei hian lei leh hralh kawngah inbumna a thlen chang a awm ṭhin a ni.

Chuvangin, sorkar lam aṭanga a rate bithliah loh mai ṭha zawka hriat a nih vangin a hring leina rate hi siam a ni ta rih lo.