Adviser to CM-in Khawzawl a tlawh

Adviser to chief minister (Implementation of Hand-Holding Policy) KC Lalmalsawmzauva chuan nimin khan Khawzawl a tlawhin, Khawzawl DC meeting hall-ah sorkar department hotute a kawm a, "Hand-Holding Policy thawh khatnaah sorkarin a tarlan thlai chi li chingtute ‘ban a kaih’ hmasak tum an ni," a ti.

KC Lalmalsawmzauva chuan, ‘kalphung thar – mipui sorkar’ siam an tumna kawngah sorkar hnathawkte ṭawiawmna leh phurpuina an dawng ṭha hle tih a sawi a, "Mizoram sorkar chuan Hand-Holding Policy chu ṭhuang hnihin kalpui a tum mek a, a thawh khatnaah sorkarin a tarlan thlai chi li chingtute ‘ban a kaih’ hmasak tum an ni a, hei hian kum 2-3 hnuah chuan tharchhuah chuangliam (excess production) thlenin Mizoram chu ‘market economy’-ah a hlankai beisei a ni," a ti.

Mizoramin tharchhuah chuangliam a neiha ‘market economy’-a a luh theih chuan ṭhalai lehkhathiamte'n thlai thar sawngbawlna an kalpui dawn tih sawiin Lalmalsawmzauva chuan, "Hand-Holding Policy thawhhnihnaah chuan heng ‘1st Generation Enterpreneur’-te hi an 'ban a kaih’ a ni dawn," a ti a sorkar department-te chu Mizoram hmasawnna dah hmasa chunga hna thawkho turin a chah.

Adviser to CM chuan Mizoram sorkarin Mizote chu a huhoa che ṭhin (communitarian society) an nihna ang leh khawvel kalzela capitalist society ziarang an kai tawhna behchhanin mipuite ‘ban a kaih’ a tum mek tih a sawi a, "Sorkarin he policy a kalpuina kawngah hian khawl thar bun ai chuan a awm sa tih changtlun belh emaw, hman ṭangkai leh zual dan zawn ṭhain a hria," a ti a; sorkarin thlai leina rate a siam chhan chu kut hnathawktute'n ṭanchhan ṭha (bargaining power) an neih theih nan a nih thu a sawi bawk.

He hunah hian sorkar bungrua/ hmunhma hman ṭangkai loha awm mek (non-functioning assets) chungchang sawiho bawk a ni.