KHAWTHLIR

General Administration department hnuaia Aviation Wing chuan nimin khan August 24, 2020 aṭanga Lengpui Airport-a thlawhtheih­na thlawh dan tur a ti­chhuak. Chawlhkar khatah Thawhṭanni leh Zirtawpni apiangin Indigo Airlines a thlâwk ang a, Nilaini apiangin Air India a thlâwk ang.

Aizawl DC R Lalram­nghaka chuan August 19, Nilaini khan thupek chhuahin, Covid-19 hri léng laka mipui an him zawk theihna atan Rangvamual leh Phunchawng chu vawiin (August 21) zing dar 4:30 aṭanga September zing dar 4:30 thleng luh leh chhuah phal lohna hmun (containment zone)-ah a puang. Veng pahnihte hi lirtheia paltlang phal a ni a, paltlang turte chu din khawmuan phal a ni lo.

Covid-19 a vei tih August 18, 2020-a hmuh chhuah tâk Laltlankima Fanai, Venghnuai chhungte chuan, Focus Photo Express neitu Salem Venga chengte chhungkua inah tun hnaia Laltlankima Fanai a kal lo tih an sawi a, an dawrah erawh a kal thu Vanglaini an hrilh.

Chief secretary Lalnunmawia Chuaungo chuan State Disaster Management Authority SEC chairman a nih angin nimin khan thupek a chhuah a, state páwn aṭangin Mizo­ramah vawk leh vawk sa aṭanga thil siamte lak luh khap a nih thu a puang. Chief Secretary chuan, AHVety department chu vawk vulhna hmunhma tihthianghlim dan te, natna veia rin vawkte chu khung hran dante leh vawk thite ṭha taka phûm a ni em tih en zui turin a ti nghal bawk.

State Referral Hospital-ah nimin khan Covid-19 vei mi pahnih leh rinhlelh thilah mi pakhat dah luh a ni. SRH-ah hian Covid-19 vei mi 34 an awm mek a, ICU leh SICU-ah pahnih ve ve awmin, Isolation Ward-ah mi 30 an awm. SRH-ZMC Bulletin tarlan danin, ICU-a awmte hi ngaihtuahawm an ni lo.