KHAWTHLIR

House-ah sún

Nimin Assembly session-ah January 14, 2024-a pneumonia vanga boral ex minister KL Lianchia (91), Electric Veng, Aizawl sun a ni. KL Lianchia hi MLA atan Peoples Conference Party ticket-in Lungpho Bialah ṭum hnih leh Mizo People's Conference ticket-in Khawhai Bialah vawi khat thlan tlin a ni a, kum 1998-a MPC leh MNF sorkar inṭawmah cabinet minister a ni.

Meth man

Excise & Narcotics dept. chuan nimin khan Lallawmzuali (28) d/o Lalauva leh Lalramzauva (31) s/o Lalrengliana, Khawmawi, Myanmar nia inchhalte hnen aṭangin Tlangsam khuaah methamphetamine kg. 50.227 an man. Meth vanga mante hian Myanmar aṭanga an lak, an rem-chan anga tihral tura an ruahman mek niin an sawi.

Punkhawm khap

Aizawl district bawrhsap Nazuk Kumar chuan Mizoram Legislative Assembly ṭhutkhawm chu March 13, 2024 thleng neih tur a nih avangin, hemi chhung hian Treasury Square Dak Inpui aṭanga Raj Bhawan chhimlam gate inkar leh, Tennis Court aṭanga Treasury Bazar inkarah vantlang, politics, sakhuana leh thil dang vangin mi panga aia tam punkhawm leh bengchheng siam khap a nih thu a tarlang.

Tuivai khuah tum

MNF member Ramthanmawia zawhna chhangin Power & Electricity minister F Rodingliana chuan Tuivai khuah a, power siam chhuah tum a nih thu House a hrilh a, "Investor-te pawh biak tawh an ni. Amaherawhchu, DPR hi a lo hlui deuh avangin update tura ruahman a ni a, chumi hnuah investor-te nen inbiakṭhat leh tura ruahman a ni," a ti.

MP inthlan

Lawngtlai district bawrhsap Cheemala Siva Gopal Reddy kaihhruaiin nimin khan Lok Sabha MP inthlan lo awm tur atana inbuatsaih nan Lawngtlai district-a sorkar pisa hrang hrang hotute an ṭhukhawm. Lawngtlai district-a MLA Election 2023 kalpui dan thlirletna leh harsatna hrang hrang awmte chinfel dan tur sawiho niin, election official-te duty-na hmuna tui, inthiarna leh kawlphetha ṭha taka thlunzawm a nih theih nan hmalak an rêl.