Assam Rifles chêt dan an dem rawn

August 18, 2020 tlaia Mizorama lut tur Assam Rifles mi leh sate'n Vairengtea Mizoram sorkar thuchhuak zâwm lo leh Rapid Antigen Test hmanga swab test ti loa an kaltlang lui chu páwl hrang hrangin an dem thu an tarlang.

Assam Rifles-te'n state sorkar dan siam zâwm loa Vairengte checkgate an paltlang chu Mizo mipui zahlohnaa an ngaih thu sawiin MZP chuan, "Mizo mipui leh tláng mite 

ṭhian nia inchhál AR-te chêt dan hi kan dem tak zet, hripui thehdarh pawh an pawisa lo tihna a ni," an ti a; checkgate paltlang luitute chu hrem ngei turin AR DIG Brig. Vinod S an phût bakah, a ṭul anga hma la turin Mizoram sorkar an ngen.

MZP chuan, Covid-19 lèn ṭan tirh aṭangin Mizoram mipuiin sorkar thuchhuakte ṭha takin an zâwm tih sawiin, "Chutih laia AR-te chêt dan hi Mizorama cheng mekte himna tura sorkar leh mipui hmalakna pawisak lohnaah kan ngai," an ti a; Mizorama hripui vei zinga a tam zawk chu sipai an nih thu leh, AR mi leh sate pawh mi 100 chuang an nih tawh thu an sawi. AR sipaite'n sorkar dan an zawm loh mai bakah, mipui leh official duty-te tithlabár leh rîkrâp zawngin an che tih sawiin, "Kum 1988-a khawpui lailia Mizo tlangval an kah hlumte pawh kan la hre reng. Boruak ṭha taka khawsak ho kan zir mek laia sorkar leh mipui hmalakna pawisa miah loa an palzût lui hian Mizo ṭhalaite rilru a tina thar leh a ni. AR sipaite chêtna hi a theih angin kan en zui tawh dawn," an ti. MZP hian AR sipaite chu an thil tih dik loh pawm tur leh Mizo mipui an tihrálkhelh avangin Mizote hnenah ngaihdam dil turin an phût a;  dan loa Mizorama lutte chu hrem turin an phût bawk.

Nimina MPC party thu­chhuah chuan, Assam Rifles-te'n Mizoram sorkar mitmei venna nei loa Vairengte checkgate an paltlang chu MNF sorkar an ngaihnêpzia leh pawisak lohzia tilang chiangtua an ngaih thu an tarlang a; Brig. T Sailo chief minister a nih laiin sipaite'n Mizoram an zah a, an palzût ngai lo niin an sawi.

National Students Union of India (NSUI), Mizoram chuan, August 18 tlaiah Assam Rifles mi 15-te'n swab test an ti duh lo a, medical duty leh police duty-te tham lo takin an ti tih sawiin, "Buaina siam tum ang ziazánga Aizawl aṭanga Capt. Dheerendra Yadav leh sipai 25 zetin Vairengte checkgate-a an sipai mi 15 hruai luh luih tuma an inhrosa leh mipui tithlabár zawnga checkgate an paltlang lui hi kan ngai thutak hle a, pawi kan ti tak zet a ni," an ti.

Assam Rifles-te chu mipuite thamlo leh sorkar thuneitute pawh zahna nei loah puhin Mizoram NSUI chuan, Mizoram sorkar dan zâwm loa an chêtnaa mawhphurtu lakah a rang lama action lak a theih nan leh, Mizoram a chhuahsan ngei theih  nana hma la turin Mizoram sorkar an phût a ni.

NSUI Mizoram chuan, sipai rawn lutte chu Mizorama Co­vid-19 pu luttu an nih thu an sawi a; Champhai, Zokhawthar leh a chhahvela AR sipaite chet dan chungchangah, "Ramri báwr vela Assam Rifles chêt dan leh inhrosak dan te, mipui harsatna an siam zawng zawngte chhui chiang a, an chêt dan enfiahtu tur committee thuneitu sang tak din nghal tur leh, a ṭul anga hma la ngam turin Mizoram sorkar kan phût a ni," an ti bawk.