Thawktu indaih lohna a nasat avangin damdawi-inte a nih tur ang a ni lo - Health Minister

Health minister Lalrinpuii chuan Health department-ah thawktu indaih lohna a nasat avangin, damdawi-in hrang hrang (PHC, CHC etc.)-te a function dan tur angin a function theih loh thu a sawi.

Nimin Assembly Session-ah member hrang hrangte zawhna chhangin Health Minister chuan, "Damdawi-in hrang hrangahte thawktu indaih loh avangin thawktu kan dah thei lo. Health dept. kan zirchian tirh phei chuan kan tlusawp lo chauh a ni tih kan Chief Minister ka hrilh hial. Thawktu indaih lohna a nasa hle," a ti.

Lalrinpuii chuan, Zoram Medical College (ZMC)-a doctor zirlaite an zawh hunah thawktu indaih lohna a ziaawm deuh tur thu sawiin, "Tunah hian doctor, nurse, health worker leh a dangahte post ruak a tam hle," a ti a, post ruakte hnawhkhah tuma theihtawp an chhuah mek thu a sawi.

Health Minister chuan member hrang hrangte'n an bial chhung doctor an mamawh thu an sawite chu, thawktu indaih huna an pek theih tur thuin a chhang.

Doctor-te chuan awm duhna leh awm duh lohna an neih thu sawiin Health Minister chuan, "An awm duh lohna hmuna awm ai chuan an hna bansan duhte pawh an awm," a ti.

Lalrinpuii sawi danin, tun dinhmunah Mizoramah health & wellness centre (HWC) 391 a awm a, he'ngahte hian thawktu tur dah khah vek a la ni lo.