Health care sum tur la pe chhuak lo; sorkar kum kal mekah bill pek kim tum
Nimin Assembly session-ah Health minister Lalrinpuii chuan, SEDP sum cheng vbc. 40 health care bill atana dah chu pek chhuah a la nih loh thu leh, sorkar kum kal mekah health care bill bat mekte pek chhuah kim hman tum a nih thu House a hrilh.
Member hrang hrangte zawhna chhangin Health Minister chuan, "Mizoram health care atana cheng vbc. 40 dah aṭang khan damlo hnenah bill pek chhuah a la ni lo. Mah se, health care bill ba hi kan ngaih pawimawh avangin Chief Minister-in health care atan cheng vbc. 15 a pe chhuak tawh," a ti.
Health Minister sawi danin, tun dinhmunah health care bill ba cheng vbc. 45.59 a awm mek a, SEDP sum cheng vbc. 40 pek chhuah a nih hun chuan cheng vbc. 6 vel bill ba a la awm dawn. Heng damlote bill bat mek hi kumin sorkar kum ral hmain pek chhuak hman vek tum a ni.
Health care atana Asian Development Bank (ADB) aṭanga loan cheng vbc. 1,000 sorkar hmasain lak a tum chungchang zawhna chhangin Lalrinpuii chuan, "State MLA inthlan kan hmachhawn khan tlemin a ti khaihlak. Hmalak mek a nih laiin ADB lamin June, 2024 a loan sign turin an hmachhawp," a ti.