Vellore-a inentir tura kal tum Heroin thawn tumtu man a ni tawh
Mizoram aṭanga February 19, 2024 Vellore-a inentir tura kal tur heroin thawn tum an ni a, Excise & Narcotics dept. (END) chuan heroin thawn tumtu hi an man tawh.
Vanglaini thudawn danin, Vellore lama damlo hruaia awm mek Mizo pakhat chuan damdawi ken thlaksak turin Vellore-a inentir turte hi a chah a ni. Mi pakhat chuan Vellore kal turte hnenah hian damdawi nia sawi chu a pe a, Vellore-a inentir turte hian ringhlelin an thil ken tur chu an hawng a, heroin tih an hmu chhuak. END hnenah an hriattir nghal.
END chuan hemi chungchangah hian February 18, zan dar 8 khan C Laldinsanga, Chhinga Veng hnen aṭangin report an dawng a, chhui zui nghalin heroin pawh hi an man nghal a ni.
END officer-te chuan, heroin thawn tumtu phone number aṭangin social media (Facebook leh Instagram) lama a account an zawng chhuak nghal a; heroin thawn tumtu hi Lalrohlua (30) s/o Vanramchhuanga, Durtlang Leitan Ramthar a ni tih hriat chhuah a ni. Lalrohlua hi February 21 zan khan man niin, a tukah court-ah hruai a ni.
Hetianga ruihhlo inthawn chungchangah hian fimkhur a ngai hle tih tarlangin END chuan, "Hre loa heng ruihhlo kawltu nih hi dan hnuaia buaina nasa tak tawh theihna leh, inchinfel harsa tak a nih avangin thil inthawn/inkensak thuah mi tin fimkhur lehzual turin kan inhriattir a ni," an ti.
He thil thleng chungchangah hian CMC Vellore Mizo Assocition leh Vellore Mizo Welfare chuan thuchhuah siamin, pawi an tih thu an tarlang a, 'Damlohna avanga Vellore kal ṭhinte hnam dang kara inenkawl kan ni a, hun lokal zel turah hnam dangte'n hetiang zawnga min hmelhriat tur hi kan ngai ngam lo. Hetiang hi thleng nawn tawh lo se kan duh hle,' an ti.
CMC Vellore Mizo Association leh Vellore Mizo Welfare chuan damlohna avanga Vellore kal ṭhin leh lakal zel turte pawh mi thil thawn an ken hmain eng thil nge an kensak dawn tih finfiah hmasa ṭhin turin an chah bawk.