Phaizawl hman ṭangkai dan tur enfiah

Champhai DC Maria CT Zuali chuan nimin khan sorkar official dangte nen India leh Myanmar ramri dep Ṭiau kama Laili phai, Hnahlan chu tlawh a; leilet phaizawl ṭangkai lehzuala hman theihna tura mamawh leh hmalak theihna turte VC leh loneitute nen an enfiah.

Maria CT Zuali chuan, loneitute tan Champhaia kala office dâwr a harsat avangin a hmuna kal chilha loneitute hmalakna enfiah an nih thu a sawi a, "Kan district-a leilet phai awmte ṭangkai taka hman a nih theih nan line department hrang hrangte ṭanghoa hmalak tum a ni," a ti.

Bawrhsap ho hian Laili phai panna kawng FOCUS project kaltlanga siamṭhat tum leh phai châwmtu ber Tuilak lui, Minor Irrigation project hmanga tui lâkna pawh an enfiah a; loneitute chu a chhawr ṭangkaitu an nih angin, a enkawl leh venhim kawngah ṭan la lehzual turin a chah.

Leilet phaia thlai chìnte ran laka a him theihna turin a hungna siam a nih theih dan tur te, leilet bial tê lutuk ṭhiata tihlen theih dan turte sawihoa enfiah a ni bawk.