BJP rorelna a liam tawh dawn - AICC Spokesperson

All India Congress Committee (AICC) national spokesperson Mathew Antony, AICC North East incharge ni bawk chuan nimin khan Aizawl Press Club-ah thuthar thehdarhtute a kawm a; kum 10 chhung India rama BJP rorelna chu a liam tawh dawn niin a sawi.

Mathew Antony chuan, Congress Party chuan January 13, 2024 khan Chhattisgarh-a Raipur session neihnaah sorkar laipuia Indian National Development Inclusive Alliance (INDIA)-in thuneihna an chan chuan minimum support price (MSP) legal guarantee pek an tum thu an puang tih a sawi a, "Kum 2014-ah BJP leh prime minister Modi-ten India mipuite thutiam hlentheih loh an tiam a, a thusawite erawh Prime Minister a nih hnuah a theih­nghilh vek thung. Mah se, heng zawng zawng hi hun rei lote hnuah a liam mai dawn a, kum 10 chhung rorelna dik lo chu a liam tawh dawn," a ti.

Narendra Modi chuan foreign bank-a black money dahah Congress a puh tih sawiin Mathew Antony chuan, "Chu'ngte chu ka la lêt vek ang a ti a, India rama mi tinte bank account-ah cheng nuai 15 ṭheuh dahsak a tiam pawh kum 10 a raltaa, eng 'bank transfer' mah a la awm lo. Kum tin hna vaibelchhe hnih ka siam ang a tih laiin India rama unemployment rate chu kum 45 chhunga a san ber lai kan tawng mek," a ti a; Modi sorkar hnuaiah central sorkar department, corpo­rations/PSUs-ah ringawt pawh hna ruak nuai 30 a awm thu a sawi.

Mathew Antony chuan, sorkar dang hunlai aiin Modi sorkar­ah loneitu intihlum an tam zawk tih a sawi a, "Thil man a sang zual zel a. Gas cylinder man chu a let hnihin a pung tawh a, diesel leh petrol mante chu international market-a crude oil man a tlahniam chungin a lêt hnihin a to tawh bawk. BJP sorkar chuan sipai atana inlak dan ṭha tak system awm reng chu hnawlin Agnipath scheme a kalpui a, hei hi India security tan a ṭha lo," a ti a; Modi sorkar hnuaiah kum 2014-a India leiba neih cheng vbc nuai 55 chu tunah chuan vbc nuai 185 a nih tawh thu a sawi bawk.