KHAWTHLIR

Thisen pe

Aizawl College NSS chuan nimin khan an college-ah thisen pek an huaihawt a, Civil Hospital, Aizawl tan thisen unit 97 an pe. Thisen petute mipa 70 leh hmeichhia 27 an ni.

Home delivery kalpui tawh

ZPM member VL Zaithanzama zawhna chhangin Food Civil Supply & Consumer Affairs (FCSCA) minister B Lalchhanzova chuan, tun dinhmunah Aizawl Municipal Corporation (AMC) huam chhung leh district hqrs. tinah LPG home delivery kalpui vek a nih tawh thu House a hrilh, "Veng zawng zawngah kalpui theih a la ni lo," a ti.

Raltlan camp kang

February 21, Nilaini zan dar 6 vel khan Sihhmuia raltlan camp-II chu bungraw chuh hman loin a kang a, chhungkaw pariat chenna a kang ral. Kangmei hi eirawngbawlna aṭanga chhuak nia hriat a ni a, hliam tuar an awm lo. Nimin khan hnatlangin raltlante awmna tur hi Sihhmui khawtlangin an sa ṭha nghal a ni.

Kawng khar hun

Aizawl Traffic SP Stephen Lalrinawma chuan Vaivakawn Zohnuai leiminna hmuna hna thawh mek chu a zualpui zawh fel tawh a nih avangin helai hmuna kawng khar hun chungchangah thupek thar a tichhuak a; helai kawng hi thuleh awm hma chu chhun dar 12:30 - 1 leh tlai dar 4:30 - 5 inkarah khar tur a nih thu a tarlang. Thupek zawm lote chu MV (Amendment) Act, 2019 Section 179 hmanga hrem theih an ni.

Hnam thuam

Mizoram sorkara General Administration Department (GAD) chuan Chapchar Kût, 2024 lo thleng tur pualin Mizoram sorkar hnuaia thawk zawng zawngte leh state sorkar hnuaia public sector undertaking, boards, bodies leh agencies hrang hrang hnuaia thawkte chu February 26-29, 2024 chhung hian an pisa ṭheuhah Mizo hnam thuam inbel vek turin a hriattir.

Trainers training

Lok Sabha MP inthlanpui neih tur atan nimin khan Lunglei, Siaha, Lawngtlai leh Hnahthial district-a Assembly Level Master Trainer-te pualin Lunglei DC conference hall-ah training buatsaih a ni.