MNF laka fimkhur turin mipui chah

Congress party ṭha-laite chuan thuchhuah siamin, "Thlan tlin an nih hnua inthlan dawna an intiamkamna tam bawhzui ngai loa Mizo mipui vawi tam tak min bumtu MNF chuan August 27-a local council leh village council inthlan turah mipuiah bumna hmanrua an hmang leh mek," an ti a; MNF party-te bumna laka fihlim turin mipui an chah.

MPYCC chuan, inthlan dawnah MNF-in Parliament-ah Citizen Amendment Bill (CAB) an do tlat tur thu an aupui nasat viau laiin, Parliament-ah an aiawha ding tur chuan CAB chu a thláwp leh ta zawk tih an sawi a, "An thlawp mai pawh ni loin, khawvel hmaah an MP-in CAA vanga lawmthu sawina a sawi chhuak hial zawk a ni," an ti.

MNF party-in inthlan hmaa an tiam - kawng chhâwng, vai buhfai ring tawh loh, Assam Rifles sawn chhuah, Aizawl traffic jam free capital, chhungkaw tin hnena cheng nuai thum sem, damlo hnena cheng nuai hnih pek leh a dangte chu term chanve thuneihna an chan tawh chhungin tihhlawh­tlin a ni lo a, hmalakna hmuh tur pawh an awm lo tih, MPYCC chuan an sawi a ni.

Congress ṭhalai chuan, MNF sorkarna hnuaiah hian MNF hotu lawkte tan sum hman sên loh a awm a, hna an insem mek laiin, mipui náwlpui sumah an harsa em em thung tih sawiin, "Mipui tan sum hman tur a awm lo mai ni loin, mipui thau min sawhsak a, min hrêk rethei a ni," an ti a; ni tin eichawp man nasa taka a pung leh electric bill nasa taka a sang chu MNF sorkar hlawh­chhamzia tichiangtu niin an sawi.