Covid-19 vaccine pek dan tur thlir lâwk

Nimin khan Aizawl, Serchhip leh Lawngtlaiah District Task Force on Covid -19 an ṭhukhawm a; Covid-19 laka invenna damdawi (vaccine) a rawn thlen huna pek chhuah dan tur an thlir lâwk.

Aizawlah chuan bawrhsap R Lalramnghaka hoin an ṭhukhawm a; vaccine pek chhuah dan tur te, doctor, nurse leh medical staff-te'n inpuahchahna an kalpui tawh chinte leh mawhphurhna leh chanvo insem dante an thlir lawk a ni.

Ruahmanna awm sa ang chuan healthcare worker zingah pawh damlo enkawltute, swab sample latute leh Covid-19 volunteer-te'n an dawng hmasa dawn. Vaccine dawng hmasa tura thlan chhuahte list dah luh (upload) vek a ni tawh.

Serchhipa ṭhutkhawm kaihruaitu DC Kumar Abhishek chuan, Mizoramah Covid-19 vaccine la hmu lo mah se, hmuh huna district chhunga a dawng hmasa turte sorkar laipui leh state duh danin an lo inruahmanfel hmasak thu a sawi a, "Kan district hi vaccine dawng hmasa tur list thehlut hmasa berte zinga mi kan ni," a ti.

Meeting-a tarlan danin, Serchhip district chhungah vaccine dah lailâwk theihna (facility) hospital leh PHC 10 a awm mek a; chu'ng zinga pakhat Mercy Private Hospital tih loh chuan a phurh sawnna tur báwm an nei vek tawh.

Lawngtlaiah pawh DC Dr Andrew H Vanlaldika hoin an ṭhukhawm a, vaccine peih a nih huna pek hmasak tur, hriselna lama thawktu (health care worker)-te hnena hri danna pek dan tur ruahmanna an sawiho a ni.

Andrew H Vanlaldika chuan, Covid-19 hri danna peih a ni dawn hnaia lang chu lawmawm a tih thu sawiin, "Hri danna a awm hma chu fimkhurna dan hrang hrang zawm zui zel a pawimawh. Hriselna hi man tam tak a nih avangin, hri danna hman theih a nih hnuah pawh inthlahdah phah chuang loh tur a ni," a ti.