Kuhva rah mansa dahna tur kudam indaih loh vangin harsatna tawk
Mizoram Resources Mobilisation Committee (MRMC) leh Central Govt. Organisation-te chu nimin khan MRMC vice chairman Haukhuma Hauzel kaihhruaiin Secretariat conference hall-ah an ṭhukhawm. Custom hotute chuan, kuhva rah man sa dahna tur kudam an indaih loh avangin harsatna an tawh thu an sawi.
Ṭhutkhawmah hian sorkar laipui department hrang hrang hnuaia thawk, Mizorama awmte chuan an hnathawh dan, an mamawh leh harsatna an tawhte an sawi a, sutkianpui dan a awm chuan Mizoram tan tun aiin an thawhhlawk lehzual an inbeisei thu leh, Mizoram sorkarin an chenna tur quarter ngaihtuahsak thei se an duh thu an sawi.
Custom department hnuaiah kuhva rah tawlhruk cheng vbc. 131 hu man a nih tawh thu leh kuhva rah mansa dahṭhatna hmun tur kudam an indaih lohna chuan harsatna a thlen thu tarlan a ni.
Haukhuma Hauzel chuan, Mizoram tan an theihtawp chhuah turin sorkar laipui hnuaia thawkte a chah a, a bik takin tax leh non-tax resources base tihsan a nih theih nan an thiamna leh theihna hmanpui turin kalkhawmte a sawm bakah, Mizoram hmasawnna atan an thiltih theihte ziaka MRMC hnena thehlut turin a ngen bawk.
He hunah hian Mizoram chhunga Project Monitoring Committee vice chairman R Lalrinawma, MRMC member secretary Ramchuana leh central sorkar hnuaia thawk official-te an tel a ni.