Hatkora sawngbawlna tur hmun enfiah
Nimin khan Mizoram Food & Allied Industries Corporation (MIFCO) chairman Lalṭhazuala Rawite chuan Hortoki-a hatkora sawngbawlna hmun tur chu a hmunah tlawhin, an hmalak tum dante a enfiah.
MIFCO Chairman chuan, hatkora sawngbawlna tur hmun chu hatkora chingtu chhungkaw tam tak ten ṭangkai taka an chhawr theih ngei nan hlawhtling ngei thei se a duh tih sawiin, "MIFCO aṭanga pawisa an siam ṭhin kha keini chuan pawisa aṭangin MIFCO hi kan siam dawn a ni. Tunah hian sapthei leh lakhuihthei pawh sawr reng a ni a, sorkar tharah market ṭha zawk a awm theih nan kan buaipui sak dawn," a ti.
Hatkora aṭanga essential oil siam chhuaktu Laldingngheti Bawitlung, MZU chuan Mizoramah hatkora hi chi thum a awm a, chu'ng zingah chuan Hortoki leh a chhehvela hatkora chu sawngbawl atana ṭha ber a nih thu leh hatkora chu a tui leh a kâwrte manto zawka hralh theih tura buatsaih tum a nih thu a sawi.
Hortoki-a hatkora sawngbawlna tur hi Senhri Natural Pvt. Ltd. enkawlna hnuaiah kalpui tur a ni a, tunah hian ṭul hrang hrangte an buaipui mek.
Thudawn danin, Hortoki khua hian kum 1954 aṭang khan hatkora hi ramhnuai ser tiin an chîng ṭan a, kum eng emaw zat chu state pawn lamahte hralhin chhungkaw tam takin eizawn nan ber an hmang ṭhin. Kum 10 liamta aṭang khan hatkora rawn leisak ṭhinte chuan an rawn leisak theih tawh loh avangin a hralhna lamah harsatna an tawk ṭan a, tunlai hian pum khat Re. 1-in an hralh thei hram a ni.
Hatkora huan nei engemaw zat chuan an tihral phah tawh a, ṭhenkhat chuan tui sawr leh a kâwrte pho roin man to zawkin hralh dan kawng an zawng ṭhin a ni.