R Vanlawma chanchin zirho

Govt. Aizawl College-a History department leh Mizo History Association te chuan nimin khan GAC conference hall, Mualpuiah R Vanlawma chanchin zirhona 'Symposium on Contribution of R Vanlawma (1915-2006) to the people of Mizoram' an buatsaih a, adviser to CM Lalmuanpuia Punte, MLA-in a hmanpui.

Lalmuanpuia Punte chuan, "Pu R Vanlawma hi Zoram hmangaihtu, Mizo hnahthlak zawng zawngte huang khata dah tlattu a ni. Mizoram hnuk khawih thil a awm a nih chuan telve ngei tur leh a mawhphurtu zinga mi nia inhriain a tel lo chuan Zoram chu fel hlelin a hre tlat ṭhin," a ti.

Adviser to CM sawi danin, R Vanlawma hian thil ropui leh hlawk zawk chauh ni loin, thil eng pawh a ṭha leh dik chu a pawm a, a ṭha lo nia a hriat chu a hnawl mai ṭhin.

Mizo History Asso­ciation president Prof. Sangkima'n 'Con­tribution of R. Vanlawma (1915-2006) to the people of Mizoram' chungchang a sawifiaha, sawihona neih a ni bawk.