Lawngtlai DISHA an ṭhukhawm

Lawngtlai District Development Co-ordination and Monitoring Committee (DISHA) chu nimin khan Lawngtlai DC conference hall-ah an chairman C Lalrosanga, Lok Sabha MP kaihhruaiin an ṭhukhawm a; Lawngtlai district-a sorkar laipui hnuai scheme hrang hrang kalpuitu department leh tlawmngai pawl hruaitute an tel.

C Lalrosanga chuan, ṭhutkhawm chu sorkar kaltlanga hmalakna kawngah sorkar hnathawkte bakah khawtlang leh tlawmngai pawl hrang hrang hruaitute ngaihdan ngaihthlakna hun pawimawh tak a nih thu a sawi a, "DISHA ṭhutkhawm hmasaa lo rel tawh angin Lawngtlai leh Siaha inkalpawhna tur ‘Permanent Bridge over Tuipui Ferry’ sakna turin DPR ruahman a ni tawh a, he lei hi metre 257.8 a sei leh metre 12.15 a zau tur a ni," a ti a, he hmalakna hi a hlawhtlin chuan Lawngtlai leh Siaha khawpui inkar kal hun chhung chu nasa tak tlem phah dawn niin a sawi.

Ṭhutkhawmah hian kum 2023-24 chhunga department 17 hnuaia sorkar laipui scheme kalpui dan thlirlet a ni a; MGNREGA hnuaia chhungkaw 37,751 hnenah ni 81 inhlawhna siam a ni a, hna 2,533 zawhfel tawh leh kalpui mek 729 a awm thu tarlan a ni.

PWD hnuaia Pradhan Mantri Gram Sadak Yojana kaltlanga hna hlawm 20 kalpui zingah 13 zawh fel tawh niin, hna 7 thawh mek a nih thu pawh tarlan a ni a, fur hmaa hna tam zawk zawh fel a nih theih nana hmalak dan turte an sawiho.

Kawlphetha avanga Lawngtlai district-in harsatna an neih ṭhin dan leh heng harstana sutkian nana P&E department hnuaia 25 MVA, 132/33kV Sub-Station sak hna te, lo, huan, rama kawlphetha pawh luhna tura a hranpaa 11kV feeder siam a nih thu leh Power Sector Development Program hnuaiah kawlphetha hruipui hman lai chu hrui ṭha zawka thlakna tur dilna thehluh tawh a nih thute tarlan a ni bawk.