MSSSB ṭhiah ennawn rawtna House-in a hnàwl: Kan rilru thianglim lo se kan ṭhiat lo ang - CM

Nimin Assembly session-ah MNF member Lalrintluanga Sailo private member resolution 'Mizoram Subordinate Service Selection Board (MSSSB), Mizo ṭhalai hna zawng mekte tana rintlak leh ṭangkai tak ṭhiah hi sorkarin ennawn leh rawh se' tih chu sawiho a nih hnuah hnawl a ni. Chief minister Lalduhoma chuan, rilru thianghlim lo pu se chuan MSSSB hi an ṭhiah loh tur thu a sawi.

Chief Minister thusawi :

Chief Minister chuan, hun kha leh chen MPSC ringin Mizoram a kal ṭhin tih sawiin, "Kum 2019-ah hna lâk tur 1,000 chuang zet a awm a, chutihlaia hruaitute rilruah group 'B' bik laknaah thuneitu hran siam châkna a awm. MPSC kut aṭangin an chhuhsak ta a ni. MPSC nen an inhrui pawh nghal a, sorkar hnalak reife a khaihlak. Chutihlaia kan hruaitute chhuanlam awm chhun chu 'MPSC-in an hna an zo lo, hna an la chak tâwk lo' tih a ni," a ti.

MSSSB din a nihlaia MPSC Chairman chuan, hnalak theih loh an neih loh thu leh indaih lohna an nei lo tih a puan thu sawiin Lalduhoma chuan, "MPSC Chairman thusawi hi pawm loh theih a ni lo. Din a nih lai khan party tinin kan dodal a, dodalna kara piang, a bilha tho lo a ni. Ruling party-in duh duha a tihdanglam theih body a ni a, a him lo," a ti a, rilru thianghlim lo pu se ṭhiat loin, chhawrve an duh tur thu a sawi.

Chief Minister chuan, ruling party-in duh duha a tihdanglam theih nen innghen reng an duh lo tih sawiin, "Constitutional body ni lo, ruling party-in duh duha a tih theih na nâ nâ chu confidential ang deuhthawin chairman zawnna chhuah a ni ṭhin. A dil duh tam takin dil theih tih hre loin an dil loh phah ṭhin. Chairman atana party adviser ruat hi sawimawi tum chi a ni lo," a ti.

CM Lalduhoma sawi danin, MSSSB chairman zinga pakhat chu Tuichang biala ding tura sawi, vangvat kai a ni a; pakhat leh chu China-ah pawh kal ve vangvat kai tak a ni. MSSSB ṭhiah a nih avangin ṭhalai zingah tuar phah an awm dawn lo a, ṭhalai beidawn phah pawh an awm lo ang. MSSSB-a form fill up zawng zawngin a hranpa-a application an thehluh leh a ngai dawn lo a, MPSC-in an chhawm dawn.

Application form an thehluh laia an kum en tur a ni a, tute emaw fuihpawrh tum a ṭha lo a; MPSC-in MSSSB lak ai an la mai dawn a ni.

DPAR Minister thusawi :

MSSSB concern department DPAR minister K Sapdanga chuan, MSSSB chu ṭhiah a la nih loh thu sawiin, "February 16-ah tihfel ngaite tihfel a, February 29-ah MPSC-ah luhpui ni se tih a ni. Ṭhiah tâk tih hi ṭawngkam dik a ni chiah lo," a ti.

K Sapdanga chuan, June 10, 2019-ah Cabinet meeting-in MSSSB din an rêl tih sawiin, "June 19, 2019-ah notification chhuah a ni. Chairman tur zawn a ni a, thil mak deuh awm chu diltu zingah central service-te an awm nual laiin, ruling party adviser a tling nawlh," a ti a, file inṭhen dan tur siam mumal a nih loh avangin March 30, 2020-ah MSSSB leh MPSC-in file an inchuh nghal thu a sawi.

DPAR Minister chuan RTI Act hmanga zawhna MSSSB-a thawktute'n an chhannaah, hna lak dawnin politician-te an inrawlh thu tarlan a ni tih sawiin, "MPSC-in hnalatu, constitutional body kan ni a, min puitu tur kan mamawh e, ti se ngaihhnathiamna chin a awm. Hetiang awm si loa political body aṭanga MPSC puitu ruat hi a hlauhthawnawm hrim hrim," a ti.

MSSSB chu MPSC pawhin ṭul a tih loh ngawih ngawih, political pressure avanga executive body-in a din a nih thu sawiin, "Duh duha tihdanglam theih, ṭhalaite tana hmakhua innghahna tur body siam hi ram tan leh ṭhalaite tan a him lo. Thla tin an awm loh pawha kan kal theihna reng thawkin cheng nuai 11 sen ral ṭhin a ni," a ti a, ZPM kaihhruai sorkar chuan constitutional body tihchak ṭha an tih thu a sawi.

Leader of Opposition thusawi :

Leader of opposition Lalchhandama Ralte chuan, ram tana ṭha turah chuan constructive opposition nih an tum thu an lo sawi tawh ṭhin tih sawiin, "Ṭhalaite tan leh group B (non gazetted) chin tana ṭha em em ṭhiahna tur han puan nghal ngawt hi mak kan ti," a ti.

Lalchhandama Ralte chuan, Indian Constitution hnuaiah dan ang thlapa din MPSC a awm thu sawiin, "Hun rei tak hna an la, a ṭhain fair kan ti. Hnalatu board pakhat chiah neih hi hun leh hmunin a zo loa, ṭhalaite tan duhkhawp a ni lo. January-a lak tura pek pawh December-ah pawh an la hleithei lo," a ti a, MPSC chuan khawih tur an ngah avangin hna an lak chak theih loh thu a sawi.

MPCS chuan direct recruitment chauh ni lo , promotion, limited department exam, confirmation etc. an khawih tih sawiin Leader of Opposition chuan, "UPSC awm chungin SSC a awm a, state dangah pawh MSSSB ang deuh hi a awm deuh vek tawh. Mizoramah neih ve a ngai tiin June 10, 2019 khan DPAR-in an zirchian hnua recommendation zulzuiin MSSSB din hi pawm a ni," a ti.

Lalchhandama Ralte chuan, MSSSB bulṭantuah mi hming ṭha an dah tih sawiin, "Political party chu inep kan nih avangin sawiselna a awm. An term chhunga hnalak enin a fair lo tih sawi khawiah mah a awm lo. Ṭhalaite pawhin an ringngam a, rintlak an ti," a ti a, MSSSB ṭhiah a nih chuan Mizoram rohlu kum li chauha upa hi a pam hai dawn tihna a nih thu a sawi.

Opposition Group Leader chuan ZPM sorkarin MSSSB chu ṭhiah a hnekin, group C leh B hna lak pawh an kuta an dah an lo rin zawk thu a sawi a, "In ṭhiat duh a nih pawhin in vawmkhawmna tur a inpui peih phawt rawh u. An la inpeih loa, an la indaih lo. An mamawh an rawn thlen lawm lawm pawh in la tihsak thei lo. Hna pending, service pending tur hi ṭhalaite an beidawng dawn," a ti.

Resolution puluttu thusawi :

MNF member Lalrintluanga Sailo chuan a resolution chu ruling lam ha hawlh zawng tak a nih a rin sa thu sawiin, "Sorkar hmasa thil ṭha tih ṭha kan ti loa, he motion hi kan thlawp lo ti mai se," a ti a, 'lal ngai lo lal a na, an lal a kha' tih a lan chian thu a sawi.

Kum 2019 kum tir lamah MPSC Chairman biak a nih thu sawiin Lalrintluanga chuan, "MPSC programme leh calendar December thleng a full tawh thu a sawi. Primary zirtirtu 120 lak tur written tih aṭanga kum 1 hnuah interview koh theih a ni lo. Chutiang karah chuan DPAR-in an zirchian hnuah MSSSB hi a lo piang ta a ni. A hotuah party lam ngaihtuah ngai kan ti lo, an qualified em tih ngaihtuah tur," a ti.

Lalrintluanga chuan, MSSSB-ah ṭhalaite'n beiseina thui tak an neih thu sawiin, "MPSC chu constitutional body tih kan hria. Mah se, an zawh loh nghawngkawl kan bahtir leh dawn. No thum belah no 10 chhumtir kan tum. An calendar duh duha sorkarin a tih theih a ni lo," a ti a, MSSSB pawh full autonomy nei thoa kalpui a nih thu a sawi.