Saphu kâwr hmanga sumdawng Rs 10,000 chawi turin hrem

Aizawl District Judicial Magistrate chuan tunhnai khan, Saphu kâwr (pangolin sales) hmanga dan loa sumdawnna a inhnamhnawih mi pahnih chu Rs 10,000 ve ve chawi turin a hrem a; pawisa chawi tur an neih loh chuan ni 90 chhung jail an tang dawn.

Thudawn danin, dan phal loh Saphu kâwr hmanga sumdawnnaa inhnamhnawih mi pahnihte chu David Lalthutiama (56) S/o Lalthanzauva (L) Ainawn Veng, Aizawl leh Lalvarsanga (33) S/o H Zosiamliana, Sakawrdai-te an ni a; an pahnih hian Judicial Magistrate chuan Rs 10,000 ve ve chawi turin a hrem a, an pawisa chawi turte hi an pe thei lo a nih chuan ni 90 chhung jail-ah tan tir (simple imprisionment) tur an ni.

Saphu kâwr hmanga dan bawhchhetute hi September 15, 2023 khan EFCC department leh Wildlife Crime Control Bureau (WCCB) ṭangkawp chuan manin, Wildlife (Protection) Act, 1972 hnuaiah thubuai an siamsak a, man an nih lai hian Saphu kâwr kg 24.5 an lo kawl a ni.

Wildlife (Protection) Act, 1972-ah chuan Saphu (pangolin) hi Schedule I-ah dah a nih avangin dan loa Saphu kâwr hmanga sumdawngte chu Wildlife (Protection) Act, 1972 Section 51 (1) in a sawi ang chuan kum 3-7 thleng jail-a tantir leh Rs 25,000 aia tlem lo chawitira hrem tur an ni.

EFCC chuan, "Mizoram rohlu - kan ramngaw leh nung­chate nasa leh zuala humhalh kawngah leh dan bawhchhetute zawnchhuah kawngah min thawhpui zel turin mipui kan ngenin kan beisei a ni," an ti.