Politics tel loin sangha chi dawng tur thlan a ni dawn - Fisheries Minister

Fisheries minister Lalthansanga chuan sangha chi semnaah politics inrawlh phal a nih tawh dawn loh thu sawiin, "A ti tak tak turte hnenah pek a ni dawn," a ti.

MNF member Ramthanmawia zawhna chhangin Fisheries Minister chuan, Mizoramah sangha tharchhuah a tam tawk lohna chhan chu sangha note duh anga ṭha hmuh loh vang a nih thu a sawi a, "Tin, a chi supply-ahte hian hleih neihna a tam niawmin a lang," a ti a, hleih neihna hi sangha tharchhuah a tlemna chhan pakhat a nih thu a sawi.

Lalthansanga chuan, sangha tharchhuah tam a nih theihna atan nasa takin hma an lak thu sawiin, "District level committee pawh siamṭhat a ni dawn. Political selection tel loin, a ti tak turte hnenah sangha chi pek a ni dawn. Chu chuan sangha thar chhuah a tipungin, chhungkaw tam takin eizawnna an neih phah thei turah ka ngai," a ti.

Fisheries Minister sawi danin, sangha dil ṭanpuina kum 2019-2020 ah mi 188, 2020-2021 ah mi 1,759, 2021-2022 ah mi 1,449 leh 2022-2023 ah mi 506 hnenah pek a ni.