Saza no hruai humhalh turin mipui ngen

Kolasib district-a saza no hruai humhalh chungchangah district bawrhsap John LT Sanga chuan mipuite hriat tur a tichhuak a; ramvak emaw, sa pela nungcha tirem zawnga vakchhuak an awm chuan a rang thei ang bera DFO, Police leh DC office-ah hriattir turin VC leh YMA-te a ngen.

John LT Sanga chuan, Kolasib Divisional Forest Officer (DFO) hnen aṭangin tunlai hian Kolasib district huam chhung hmun hrang hrangah saza no hruai an awm mek thu an dawng tih a tarlang a, "Saza hi Mizoram State animal a nih angin nasa taka humhalh a ṭul a, ramsa humhalh hna hi Forest department mawh bik mai a ni lo a, a mi chengte hian kan duata kan humhalh a ṭul avangin sa pela nungcha leh ramsa kan neihte tihlum an awm chuan kum 3-7 chhung jail-a tantir leh Rs 25,000 aia tlem lo chawitira hrem theihna Wildlife (Protection) Act, 1972 a awm," a ti.

Kolasib district mipuite chu nungchate leh ramsate humhalh kawngah theihtawp chhuah ṭheuh tura ngenin Bawrhsap chuan, "VC leh YMA-te chu ramvak emaw, sa pela nungcha tirem zawnga vakchhuakte an awm chuan a rang thei ang bera DFO, Police leh DC office-a report turin kan ngenin leh kan inhriattir a ni," a ti bawk.