Zawhfel hmain GAWSS Phase-III hawng : Ṭawi tlang aṭanga tui lâk hna zo ṭep tawh

PHE minister Prof. Lalnilawma chuan, Greater Aizawl Water Supply Scheme (GAWSS) Phase-III chu zawhfel a nih hma-a hawn a nih thu leh Ṭawi tlang aṭanga Aizawl khawpui chawmtu tur tui lak hna zawh ṭep a nih tawh thu nimin Assembly session-ah House a hrilh.

ZPM member VL Zaithanzama zawhna, September 2020-a zawh tur GAWSS Phase-III zawh a la nih loh chhan chhangin PHE Minister chuan, "Tunah kum 2024 a ni tawh a, a hun tura tiha zawh a nih loh chhan chu ministry hmasate pawhin an thawk muang a nimaithei. Tunah hian kan bawhzui mek a ni," a ti.

Prof. Lalnilawma chuan, GAWSS Phase-III chu PHE Minister kal chhuaktain September 26, 2023 khan a hawn thu sawiin, "A full chuan a la hawng lo. Inthlan dawn a nih avangin kan hmanhmawh deuhte a ang. A la function ṭhat em em hma-a hawn an hmanhmawh mah mah ka ti deuh," a ti a, zawhfel a nih hunah hawn a nih leh mai theih thu a sawi.

Hawn a nih ṭumin diesel engine hmanga tui pump chhin a nih thu sawiin PHE Minister chuan, "Ṭha taka pump theih a ni. Mah se, kan inngahna ber tur chu electric engine a ni. Diesel-a kan pump a nih chuan ni khatah litre 1,000 vel sen a ngai. Kan sum leh pai dinhmunin a tlin lo," a ti.

PHE Minister sawi danin, GAWSS Phase-III khawl awmna hmunah electric power pawhluh a ngai a, chumi atan chuan Power & Electricity dept.-ah load security pek a ngai. He scheme hi UDPA hnuaia SIPMIU thawh a nih angin load security atana thla thum chhung mamawh cheng vbc. 5.59 chu UDPA minister K Sapdanga'n a pe chhuak tawh.

Load security hi February 9, 2024 khan P&E dept.-ah deposit fel a ni tawh. P&E dept. hian power pawhluh hna an thawk a, an zawhfelah SIPMIU-in thla khat chhung vel an endik ang a, engkim a ṭhat chuan thla khat hma pawhin tui pump theih beisei a ni. March, 2024-ah chuan zawhfel turah ngaih a ni.

Ṭawng tlang aṭanga Aizawl chawmtu tur atana gravity hmanga tui lak hna thawh chhunzawm zel a nih thu sawiin Prof. Lalnilawma chuan, "Chak takin kan bawhzui mek zel e," a ti a, March 2024-ah chuan zawhfel theih beisei a nih thu a sawi.