Observer-te'n district an tlawh

Special Summary Revision of Electoral Roll, 2021 kalpui meka electoral roll observer Dr Lalzirmawia Chhangte chuan nimin khan Siaha a tlawh. Khawzawl district tana electoral roll observer R Zarzosanga pawhin nimin khan Khawzawl a tlawh bawk.

Dr Lalzirmawia Chhangte chuan DRDA conference hall-ah Siahaa sorkar official, tlawmngai pawl leh political party aiawhte kâwmin, electoral roll ennawn mek chungchang a sawipui a, "Vote nei thei tawh phawt chu hmaih loin electoral roll-ah thun vek tur a ni," a ti.

R Zarzosanga pawhin Election official leh political party hrang hrang aiawhte Khawzawl DC conference hall-ah electoral roll ennawnna kal mek chungchang a sawipui a; ECI-a zawhna nei leh rawtna thlen duh neite tan a inhawn reng thu sawiin, "Electoral roll hrisel leh felfai tak neih a nih theihna turin ECI-in theihtawp chhuahin ṭan a la a, political party leh NGO-te ṭawiawmna a pawimawh a ni," a ti a, political party aiawhte chungah lawmthu a sawi.