NIT, Mizoramah hnathawh a tlem - HTE Minister

Higher & Technical Education (HTE) minister Dr Vanlalthlana chuan, Lengpui rama NIT, Mizoram Campus tur siam mekah sum sen a tam ngaihtuahin hnathawh a tlem thu a sawi.

Nimin Assembly session-ah MNF member H Lalzirliana zawhna chhangin Dr Vanlalthlana chuan, "NIT, Mizoram Campus hi a hmunah kan tlawh a, hmalak a ni. Vaibelchhe tam tak sen ni tawh mah se, hnathawh a la tlem hle. Forest dept. lamin cheng vbc. 22 chuang min dil a, meeting-te neiin min ngaidam turin kan ngen. Mah se, ngaihdam mai theih a ni lo," a ti.

HTE Minister sawi danin, sorkar hmasa-ah department dang minister chuan Forest dept. hi cheng vbc. 22 pek a tiam avangin in ngaihdam mai theih a ni lo a, pek dan tur zawn a ngai.

NIT neih ngei duh a nih laiin, central lamin lak chhuah an duh rum rum tawh. Tuna tih theih awm chhun chu a penal interest pek tur tihniam tura ngen a ni deuh mai. Chumi atan chuan lehkha siam mek a ni a, siam zawhah thuneitute hnenah thawn a ni ang.