MPCC hruaitu tharte'n charge an inhlan

Mizoram Pradesh Congress Committee (MPCC) office bearer (OB) atana thlan tharte leh hruaitu hluite chuan nimin khan Congress Bhavan-ah charge an inhlan.

MPCC president Lal Thanzara chuan, hmalam pana an dinchhuah leh theih nan an chunga mawhphurhnate ti hlawhtling turin hma an la dawn tih sawiin, "OB-a tling lote pawh kan hruaitute in la ni reng dawn a, min ṭanpuina kan ngen a, khawharin in awm lo ang tih ka tiam che u a ni. Executive-a tling lote, in zavaiin party-a hmalakna min thawhpui zel turin ka ngen che u," a ti.

MLA inthlanah an hlawhtlinpui loh avanga an party mite ngaihdam dilin Lal Thanzara chuan, "India ramah nekchepna leh tihduhdahna a nasa zela, kan ram leh hnam, kan sakhua chawikana, humhim a nih theih nan Mizo mipuite ka sawm che u . MP inthlan lo awm turah Mizoram leh India-ah INC-in hlawhtlinna a chan ngei theih nan thawkho ang u," a ti a, mipuite ṭangruala ke pen zel turin a sawm.