Mizo ṭhalaite training buatsaih dan tur sawipui

Mizoram Youth Commission (MYC) chairman Malsawmzuala Ralte leh on special duty (OSD) to CM Jonathan Lalremruata-te chu nimin khan New Delhi The Ashok Hotel-a Confederation of Indian Industry Summit-ah telin Confederation of Indian Industry (CII) leh National Skill Development Corporation hotute an kawm.

National Skill Development Corporation chief executive officer Ved Mani Tiwari leh National Head State Engagement Mayank Bhatnagar-te nen an inkawmnaah Mizoram sorkar hotute chuan, Mizo ṭhalaite tana skill development training buatsaih dan tur sawipuiin, hmalakho ni se an ti a; Okhla Industrial Estate-a Mizo ṭhalai skill training tura thawn theih dan tur ruahmanna siam ni se, an ti bawk.

CII principal advisor Brig. Ashis Bhattacharyya (Rtd) pawh kawmin, training buatsaih ho an rêl bawk a ni.

MYC chairman Malsawmzuala Ralte hian nimin vek khan HCL Foundation office, Noida-a tlawh a, general manager Robin Thomas leh manager Anjul Srivasta-te chu Mizo ṭhalaite tana hmalak theih dan tur a sawipui.

HCL foundation hotute chuan, an programme pakhat sports for change hnuaia MYC nen an thawhho theih thu an lo hrilh a; Mizo ṭhalai leh naupang harsa zawkte tan sport discipline hrang hrangah mumal takin training an pe thei a, sport-a Mizo naupangte theihna tam tak haichhuah kawnga hmala ho turin ruahmanna an siam nghal bakah, remchang hmasa berah HCL Foundation hian Aizawl an lo zin tur thu an lo hrilh bawk.