Ṭhalaite mize mila inherrem thiam a ṭul - MNF Adviser

MNF chuan nimin khan an pisa-ah chhung inkhawm an hmang a; thusawitu MNF adviser R Lalzirliana chuan, ṭhalaite mize mila inher rem a ṭul thu a sawi.

R Lalzirliana chuan, tun dinhmunah chuan politics a ni emaw, kohhran huang chhungah pawh ṭhalaite mize mila kal thiam a piang an dingchang tawh tih sawiin, "Kan rilru leh ngaih­tuahna zawng zawngte ṭhalaite rilru mila kan inherrem thiam a pawimawh tawh. Tun inthlana ZPM tlin chhan kha an ṭhat bik leh tam bik hrim hrim vang pawh ni loin, ruling chetchhiatna lai an hmuh leh hriatte kha an kher peih em em a, an vawrh nasa a, kha khan mi rilruah nasa takin hna a thawk a ni," a ti.

MLA inthlanah khan zawlnei leh thlarau mi intite thupuan a dik loh nasat thu sawiin MNF Adviser chuan, "Pathian chu ṭawngkam mai ni lo, thinlung zawng zawnga ṭih mi a ni. MNF insiamṭhat leh thuai theihna tur chuan thawktu zawng zawngte kan chak lohna lai inenfiah a ngai. Kawng engkimah Pathian râwn chung zela kal a pawimawh," a ti a, 'Pathian leh kan ram tan' titu party chuan thinlung leh tih takzeta Pathian lam an hawi reng a ṭul thu a sawi.