Bawrhsapin YMA kumpuan a hawng

Khawzawl Sub-Headquarters Young Mizo Association (YMA) chuan February 22, Ningani zan khan Khawzawl Zuchhip Branch YMA Hall-ah YMA kumpuan hawnna an hmang a; Khawzawl district bawrhsap K Lalrohlua'n hmanpuiin, kumpuan thupui ‘Ram leh Hnam Humhalh’ tih chu a hawng nghal a ni.

K Lalrohlua chuan, YMA kumpuan - ‘Ram leh Hnam Humhalh’ chu kumpuan thupuiah vawi 14 hman a nih tawh thu a sawi a, "Mizoram chu dan ṭha bik, Article 371G hmanga hung bik, ram mipuite rem tihna loa hnam tih phung thlak danglam theih loh a ni a, a hlu hle. Khawvel changkang zelah chak deuha ram leh hnam humhalh a nih loh chuan hnam lian zawkte chim ral nih a hlauhawm," a ti a, Mizoram humhalhna dan pawimawh inner iine permit-te zirchianga hman ṭangkai tum turin kalkhawmte a chah.

Ramngaw leh nungcha humhalh chu ‘Ram leh Hnam Humhalhna’ huang chhunga mi a nih thu sawiin Khawzawl Bawrhsap chuan, "Ramngaw leh nungchate chu humhalh zel a ṭul a, ramngaw tichereu leh ramsa suat zawnga chete thuneitute hnena thlen hreh loh a ṭul. Mizoramah Kohhran inkhawm a tam a, biak-in pawnlamah Kristianna lanchhuah tir a pawimawh ber," a ti a; YMA kumpuan tihlawhtlingtu nih tum ṭheuh turin a sawm nghal.