KHAWTHLIR

Tihsân tum lo

BJP member Dr K Beichhua zawhna chhangin PHE minister Prof. Lalnilawma chuan, tun dinhmunah tui bill tihsân tumna a awm lo tih House a hrilh.

Drone khap

India vice president Jagdeep Dhankhar chu February 26, 2024 hian Mizoramah a lo zin dawn a, MZU-a hun a hman tur kaihhnawihah Aizawl District Addl. Magistrate chuan MZU Campus leh a chhehvelah remote control hmang drone/aerial camera leh, hetiang lam chi reng reng thlawhtir khap a nih thu a tarlang a, "Thupek hian sorkara competent authority-in hetiang ti tura phalna bik a pekte a huam lo ang," a ti. Thupek bawhchhiate chu dan angin hrem an ni ang.

D.El.Ed result

Mizoram Board of School Education chuan February 26, 2024 chawhnu dar 2 hian Diploma in Elementary Education Examination, 2023 (December) result a tichhuak dawn a; result hi MBSE office-ah leh www.mbse.edu.in ah en theih a ni ang.

Vawk hri khuahkhirh thawkhatah ngai

AH & Vety minister C Lalsawivunga chuan Mizoramah tun dinhmunah vawk hri African Swine Fever leh PRRS-te control thawkhata ngaih a nih thu House hrilhin, "Amaherawhchu, heng natnate hian Mizoram a chenchilh tawha hriat a nih avangin hmun ṭhenkhatah a lang chhuak leh zauh ṭhin," a ti a, ramdang aṭanga vawk lakluh khap a la nih reng thu a sawi.

Pawisa man

Assam Rifles leh Hnahlan Police ṭangkawp chuan February 22, Ningani khan Murlen khuaah Liansummang (31), Hawngnghilal (44) leh Lianzatuang (39) te kut aṭangin cheng vbc. 1.03 an man. Hnahlan Police-te'n an chhuizui dawn.

Sangha khawi zir

State Agricultural Management & Extension Training Institute, Mizoram leh National Centre for Management of Agricultural Extension, Hyderabad ṭangkawp buatsaih KVK, Kolasiba kar khat awh ṭhalaite tana sangha khawi zirna, Skill Training of Rural Youth on Fish Rearing and Management chu nimin khan zawh a ni.