Aizawl Day lawmna khar a ni : Aizawl tui tlan bawlhhlawh tur venna siam a ni dawn - UDPA Minister

Aizawl Municipal Corporation (AMC) huaihawta ni li chhung awh Aizawl Day lawmna chu February 24, Inrinni khan Lammualah khar a ni a, an hun hmanpuitu UDPA minister K Sapdanga chuan Aizawl tui tlan bawlhhlawh tur venna tur siam a nih dawn thu a sawi.

Aizawla chengte tui tlan bawlhhlawh tur venna tur (waste trap) siamna atan AMRUT fund aṭangin cheng vbc. 2 AMC an pek tur thu sawiin K Sapdanga chuan, "Waste trap siam hna hi Tlawng lui fintu Tuikual lui te, Vailui leh Tuithum luiahte ṭan a ni dawn. Luikawr dangah pawh siam chhunzawm zel a ni ang. Hei hian Aizawl tui tlan a tithianghlim hle turah kan ngai," a ti.

UDPA Minister sawi danin, Solid Waste Management Centre, Tuirial tihchangtlun nan ruahmanna siam a nih tawh a, zawhfel a nih hunah chuan Aizawl khawpui zawng zawng bawlhlawh paih khawmna hmun Solid Waste Managemnet Center hian nasa takin hma a sawn dawn.

Aizawl khawpui chhim lama Hualngohmunah PWD-in bawlhhlawh sawngbawlna hmun tur a siam mek a, tlak lam ram -Luangmual ramah plastic sawngbawlna hmun, Aizawl Smart City Ltd.-in a siam mek bawk. Heng project-te hi puitlin a nih hunah chuan Aizawl bawlhhlawh paihnate chu ṭhendarh a ni ang a, bawlhlawhte chu tunlai thiamna changkang tak hmanga sawngbawl theih beisei a ni.

UDPA Minister chuan tun hnaiah AMC-in property tax a khawn ṭhat avanga Special Assistance to State for Capital Investment (SASCI) in lawmman an pek sum ṭhahnem tak hmangin AMC mamawhte tihpuitlin a nih dawn thu sawiin, "AMC pisa sakna atanc heng vbc. 30 leh AMC building sakna atan cheng vbc. 20 dah a ni," a ti

Aizawl Day lawmna khar inkhawmah hian Aizawl khawpuia dam rei ber Buangi Sailo (kum 106 leh thla 10) hnenah Aizawl mayor Lalrinenga Sailo-in lawmpuina thuziak leh pawisa a hlan.

Aizawl Day hi kawng hrang hranga lawm a ni a, infiamna hmanga in elna te, walkathon te, naupang intihhlimna te, concert etc. buatsaih a ni.