END manual angin transfer an posting kalpui a ni tawh dawn - END Minister

Excise & Narcotics department (END) minister Lalnghinglova Hmar chuan February 24, Inrinni khan Kolasib-a END Assistant Commissioner Office a tlawh. END Minister chuan, Mizoram END manual angin transfer leh posting kalpui a nih tawh dawn thu a sawi.

Lalnghinglova Hmar chuan ruihhlo dona kawngah thawhho ṭhat a pawimawh tih sawiin, "Mizoram END manual angin transfer leh posting kalpui a ni dawn. Thawktute chu lo inring lawk turin ka chah a che u. Sorkar hna thawk tan awm duhna bik emaw, awm duh lohna bik emaw neih a rem lo," a ti a, mahni awmna apiangah ṭhahnem ngai taka thawk turin thawktute chu a chah

Sorkarin ruihhlo do leh ruihhloin a tihbuaite chhanchhuahna lam a ngaih pawimawh thu sawiin END Minister chuan, "Hemi kawngah hian END chuan mawhphurhna lian tak kan nei. Thawktu indaih lohna tiziaawm tura sorkar hmalakna kalpui mek a nih laiin, ruihhlo a hluar zel bawk si avangin indaih hun nghah hman a ni lo a, thawktu awm ang angte'n mahni inring tawk tak chunga ṭhahnem ngai taka thawh sauh sauh a pawimawh. Thawktu leh hna thawhna hmanruaah a theih ang anga inthuamṭhat tum a ni," a ti.

END Minister chuan zu leh ruihhlo hluar zel leh chumi avanga thi leh HIV vei pung zel tiziaawm turin a ṭha zawnga danglamna thlen a ngai tih sawiin, chumi kawnga ram siam ṭhat hna thawhnaah ṭang tlang turin thawktute chu a sawm a, Kolasib District Office tan Rs. 20,000 a
hlan nghal.

Kolasib district Assistant Commissioner of Excise & Narcotics hnuaiah hian station pahnih - Kolasib Station leh Vairengte Station a awm a; kum 2023 chhung khan chhiah Rs. 32,81,885 an hmu.

Rakzu litre 2,898.300, zu bilhlai (fermented rice) ṭin 1,130, dawidim (yeast) kg 10, sap zu (IMFL) um (bottle) 21,158, beer um 120 leh canned beer 15,932 bakah, heroin kg 2.764, nitrazepam tablet 170 leh methamphetamine gram 734.78 an man.

NDPS Act hnuaiah thubuai 19 ziaklutin, hemi kaihhnawihah hian mi 42 an man a; MLP Act hnuaiah thubuai 3,264 ziak lutin, hemi kaihhnawihah hian mi 3,258 an man bawk.